माओवादीया केन्द्रय् अभियुक्त नं
व्यापारी रामहरि श्रेष्ठया हत्याय् ल्हाः दुम्ह धकाः उजुरी लाःगुलिं प्रहरीं मालाच्वंम्ह माओवादी कार्यकर्ता कालिबहादुर खाम (विविध) नं आः एकीकृत नेकपा माओवादीया केन्द्रीय दुजलय् 'बढुवा' जूगु दु । प्रहरीं मालाच्वंम्ह मनू माओवादीया केन्द्रीय दुजः जूगु खनाः पीडित रामहरिया छेँजःपिं अजू चायाच्वंगु दु ।
एकता केन्द्रलिसे पार्टी एकता यायेगु लागिं माओवादीं न्हापा हटे याना तःपिं फुक्कं केन्द्रीय दुजःतय्त हानं बहाली यायेवं वय्कः नं केन्द्रय् थ्यंगु खः । रामहरि काण्डं यानाः पार्टीं वय्कःयात डिभिजन कमाण्डरं निलम्बन याःगु खः ।
थ्व बारे जानकारी बिसें माओवादी नेता वर्षमान पुनं कालिबहादुर खामयात प्रहरीं मालाच्वंसां पार्टी पाखें याःगु आन्तरिक छानबिनय् धाःसा वय्कः निर्दोष ठहर जूगु खँ कनादीगु दु । पोष्टबहादुर बोगतीं उगु छानबिन ज्या याःगु खः । तर उकिया रिपोर्ट धाःसा आः तक सार्वजनिक याःगु मदुनि ।
खामया बारे सर्वोच्च अदालतय् मुद्दा लानाच्वंगु दु । उगु मुद्दाया फैसला वयेधुंकाः जक थ्व रिपोर्ट नं सार्वजनिक याइगु खँ धाःगु दु ।
