गालय् च्वनाः २१ न्हु तपस्या
ख्वप (सन्ध्या टाइम्स)/मनोक्रान्ति अभियानया संस्थापक डा. योगी विकाशानन्दया शिष्य तपस्वी रविनानन्दपाखें प्यदँ न्ह्यः सल्लाघारीइ नीछन्हु तक निराहार तपस्या च्वनादीगु ज्याया हे अनुशरण यासें वय्कःया हे रोहवरय् वंगु फागुन ४ गते मंगलबाःनिसें ख्वपया लामुगाः चौरय् ख्वपय् हे च्वंम्ह मेम्ह साधकं हाकनं २१ न्हु ताःहाकःगु भू-तपस्या शुरु यानादीगु दु ।
संसारयात हिले नु, शुरु थःपाखें हे याये नु धइगु नारा सहित न्ह्याःगु थ्व अभियानया झ्वलय् ९ फिट तजाःगु गालय् च्वनाः छुं हे मनसे छुं हे मत्वँसे वय्कलं उगु भू-तपस्या शुरु यानादीगु खः। वय्कः वइगु फागुन २४ गते सोमबाः कुन्हु तिनि उगु गालं थहां वयाः थुगु भौतिक संसारय् लिहां वइगु खँ धाःगु दु ।
