राष्ट्रपतिया भ्रमण कार्यकारी थें
यल (सन्ध्या टाइम्स)/नागरिक आन्दोलनया न्ह्यलुवा डा. देवेन्द्रराज पाण्डें आः नकतिनि जूगु राष्ट्रपति डा. रामवरण यादवया भारत भ्रमण छम्ह कार्यकारी राष्ट्रपतियागु थें जूगु बिचाः प्वंकादीगु दु ।
ललितपुर नागरिक अभियान व कवि क्याफेया मंकाः ग्वसालय् जूगु छगू ज्याझ्वलय् न्ववासें वय्कलं उगु खँ धयादीगु खः ।
थौंकन्हय् पार्टी दुने ब्रम्हूतय् बोलाबाला दुगुलिं मेगु जातियात अधिकार बीगु खँय् समस्या वयाच्वंगु खँ नं वय्कलं कनादिल। लिसें देशया थौंया सन्दर्भय् प्रहरीया लागिं धकाः ल्वाभः दुत हयेगु ज्या शान्ति प्रक्रिया अन्तर्गत मलाःगु बिचाः नं प्वंकादिल ।
अथे हे नागरिक आन्दोलनया मेम्ह न्ह्यलुवा श्याम श्रेष्ठं यदि फुक्कं पार्टीया नेतात झिन्हु लगातार छथाय् च्वनाः ज्या यात धाःसा संविधान तुरुन्त हे तयार जुइ धयादिल। थौंकन्हय् फुक्क हे पार्टीइ अनुदारवादीत हावी जुया वयाच्वंगु खँ कँसें वय्कलं सहमतीय राजनीतियात त्वःताः दलत बहुमतीय राजनीतिइ वनेवं हे थ्व समस्या शुरु खः धयादिल।
भूषणप्रसाद मिश्रं सञ्चालन यानादीगु उगु ज्याझ्वलय् संयोजक शाक्य सुरेनं नं न्ववानादीगु खः ।
ललितपुर नागरिक अभियानया हे ग्वसालय् थ्वहे वइगु शनिवाः नेवाः व तामाङ्ग प्रदेशया अन्तर सम्बन्ध बारे सहलह जुइत्यंगु दु। उगु ज्याझ्वलय् तामाङ्ग न्ह्यलुवात कुमार योन्जन व अजितमान तामाङ्गं नेवाः व तामाङ्ग दथुया मिले जूगु स्वापू बारे कनादी ।
