लगानीकर्ताया आन्दोलनं स्वन्हुया न्हि नं शेयर बजाः प्रभावित
येँ (सन्ध्या टाइम्स)/सुचीकृत कम्पनीया निगूगु बजाःया नेप्सेया शेयर लगानीकर्तातय्सं थीथी माग न्ह्यब्वयाः याना वयाच्वंगु आन्दोलनया कारण समग्र शेयर कारोबार बन्द जुयाच्वंगु दु ।
शेयर लगानीकर्तातय् स्वंगू संगठन साधारण लगानीकर्ता संघ नेपाल, नेपाल धितोपत्र लगानीकर्ता संघ व नेपाल इन्भेष्टमेण्टं मंकाः कथं नीनिगू बुँदाया माग तयाः थुगु वालं निसें चरणवद्ध रुपं आन्दोलन न्ह्याकावयाच्वंगु खः ।
लगानीकर्तां धितोपत्र दलालतय्त नं कारोबारया गुगुं नं अनुमति बियामतःगुलिं नं नेप्सेय् वंगु स्वन्हु न्ह्यःनिसें शेयर कारोबार ठप्प जुयाच्वंगु खः ।
सरकारी नीतिया कारणं शेयर बजाःया सुधार जइमफयाच्वंगु व थुकिया बारे सरकारी नियमन निकाय नापं तःक्वःमछिं सहलह जूसां निष्कर्ष पिहां वयेमफुगु धासें लगानीकर्तातय् स्वंगुलिं संगठनं वंगु विहीवाः स्टक एक्सचेन्जया ज्याकुथी हे छगू पत्रकार सम्मेलन यानाः अनिश्चितकालया निंतिं शेयर कारोबार ठप्प यायेगु निर्णय याःगु खः ।
शेयर कारोबार ठप्प जुइवं स्टक एक्सचेन्जय् पुलांगु ज्या बाहेकं मेगु छुं नं ज्या मजूगु अनया छम्ह अधिकृतं धाःगु दु। लिसें शेयर लगानीकर्तातय् आपाल भीड मुनाच्वनीगु स्टक एक्सचेन्जया ज्याकू नं सुनसान खने दयाच्वंगु दु।
थ्व हे झ्वलय् उम्ह अधिकृतं लगानीकर्तातय्सं स्टक एक्सचेन्जय् तःगु माग पूवनेधुंकूगु व मेमेगु निकाय लिसेया माग सम्बन्धय् मागया बारे अर्थ मन्त्रालय नापं सहलह जुयाच्वंगु नं जानकारी बिउगु दु ।
आन्दोलनरत संघया छम्ह पदाधिकारीं सरकारं वेवास्ता याःगुलिं थःपिंसं आन्दोलन यानागु व थुकियात कयाः याकनं संबोधन यायेत नं माग याःगु दु ।
उखे लगानीकर्तातय् थुगु आन्दोलनयात कयाः छम्ह शेयर विश्लेषकं धितोपत्र बोर्डं सम्बन्धित सरोकारवालात लिसे खँल्हाबल्हा न्ह्याकेमाःगु सुझाव बिउगु दु। लिसें उम्ह विश्लेषकं बोर्ड संचालक समितिया बैठक मच्वंनीगु थ्व अवस्थाय् व बजाः प्रति जिम्मेवार खने मदुगुलिं लगानीकर्तात आन्दोलनय् थ्यंक यायेमाःगु लिउने बोर्ड हे जिम्मेवार जूगु नद्वपं बिउगु दु ।
शेयर बजारय् जक झण्डै प्यंगू अर्ब बराबरया लगानी जुयाच्वंगु दु ।
