कार्यदलं संकल्प प्रस्तावय् सहमति यायेमफुत
राजनीतिक गतिरोध अन्त्यया निंतिं उच्चस्तरीय राजनीतिक संयन्त्रं गठन याःगु कार्यदलं मंकाः संकल्प प्रस्तावय् बुधवाः नं सहमत यायेमफुत । संयन्त्रं संकल्प प्रस्तावयात निन्हूया दुने सहमति यानाः संयन्त्रया बैठकय् पेश यायेत निर्देशन ब्यूगु खःसां थौं न्यान्हूया न्हि नं कार्यदलं संकल्प प्रस्तावय् सहमति यायेमफूगु खः ।
प्रमुख स्वंगू दलया निम्ह-निम्ह दुजः दुगु कार्यदलया बुधवाःया बैठकय् स्वंगूलिं दलं थःथःगु अडान मत्वतेवं सहमति जुइमफुगु खः । बैठकय् माओवादीं सेनापति प्रकरणय् राष्ट्रपतिं द्वंकूगु स्वीकार यायेमाःगु अडान काःगु खःसा कांग्रेस व एमालें राष्ट्रपतिया बारे संकल्प प्रस्तावय् छुं नं खँ न्ह्यथंनेमज्यूगु अडान काःगु खः ।
बैठकय् सहमति जुइमफेवं मेगू बैठकय् सहलह यायेगु धासें बुधवाःया बैठक स्थगित जूगु दु । माओवादी, कांग्रेस व एमाले दुथ्याःगु राजनीतिक संयन्त्रं वर्तमान राजनीतिक गतिरोध ज्यंकाः तिनि राष्ट्रिय सहमतिया सरकार लगायत मेमेगू विषयलय् सहलह यायेगु निर्णय याःगु खः ।
