माधव नेपालया नेतृत्वय् राष्ट्रिय सरकार एमालेया प्रस्ताव

येँ (सन्ध्या टाइम्स)/वर्तमान सरकारया नेतृत्व यानाच्वंगु नेकपा (एमालें) शान्ति प्रकृयायात निश्कर्षय् थ्यंकेत, इलय् हे संविधान दयेकेत राष्ट्रिय सहमतिया आवश्यकता तायेकाः आःया अवस्थाय् राष्ट्रिय सरकार दयेकाः न्ह्याः वनेगु प्रस्ताव तयार याइगु जूगु दु ।

एमालेया न्हूगु रोडम्याप धाःगु उगु प्रस्ताव कथं थःपिंपाखें आः सरकारया नेतृत्व यानाच्वनादीम्ह एमालेया वरिष्ठ नेता प्रधानमन्त्री माधव कुमार नेपालया हे नेतृत्वय् राष्ट्रिय सरकारया खँ यंकी धकाः एमालेया छम्ह केन्द्रीय नेतां 'सन्ध्या टाइम्स' यात धयादीगु दु ।

थःपिंपाखें अथे माधवकुमार नेपालया नेतृत्वय् राष्ट्रिय सरकार दयेकेगु धाःसां फुक्क विकल्प धाःसा खुल्ला याइ धकाः धाःगु दु। मेमेगु दलनाप उगु कथंया प्रस्तावयात कया सहलह ब्याकेगु नापं माःगु कथं सहमति तकं याना वनी धकाः धाःगु दु ।

एमालेया तःन्हु न्ह्यःनिसें हे न्हूगु संविधान दयेकेगु नितिं राष्ट्रिय सहमति ब्वलंकेगु नापं पार्टीया थीथी आन्तरिक पक्षयात कयाः केन्द्रीय कमिटीया मुँज्याय् सहलह ब्याकाच्वंगु दु। सहलहया झ्वलय् न्हूगु कथंया रोडम्याप तयार यायेगु निंतिं प्रस्ताव हयेत छगू कार्यदल नं दयेकेधुंकूगु दुसा वहे कार्यदलं थौं च्वनीगु केन्द्रीय कमिटीया मुँज्याय् प्रस्ताव हइ धकाः धाःगु दु। उगु प्रस्तावयात कयाः सहलह ब्याकाः माःगु कथंया संशोधन याना पारित याइ धकाः नं एमालेया छम्ह नेतां धयादीगु दु। एमालेया न्ह्यानाच्वंगु केन्द्रीय कमिटीया मुँज्याय् पार्टीया नायः झलनाथ खनालं यंकादीगु राजनीतिक प्रस्तावयात पारित याये धुंकूगु दु। उगु राजनीतिक प्रस्तावय् राष्ट्रिय सहमति ब्वलंकाः न्हूगु संविधान निर्माणया नितिं माःगु कथंया भूमिका म्हितेगु जुइ धकाः तकं न्ह्यथना तःगु दु।

विद्या व ओलीयात एमालेया निर्देशन

एनेकपा (माओवादी)यात न्ह्यःने लाःथे ब्वः बीगु, माओवादीया नेतातय्त तं पिकायेके बीगु नापं वृहत्त शान्ति सम्झौताय् तकं लिच्वः लाइगु कथं सार्वजनिक रुपं अभिब्यक्ति बियादीपिं एमालेया वरिष्ठ नेता केपी शर्मा ओली व पार्टीया न्वकु नापं रक्षा मन्त्री विद्यादेवी भण्डारीयात पार्टीया न्ह्यानाच्वंगु केन्द्रीय कमिटीया मुँज्यां हे आवंलि अथे न्वमवायेत निर्देशन बिउगु दु ।

लिपांगु इलय् वयाः वय्कःपिं निम्हं हे नेतातय्सं सेना समायोजनयात कयाः माओवादीयात ज्या मछिनी कथं न्ववायेगु यानादीगु कारणं हे अथे वय्कःपिंत नापं मेमेपिंत नं शान्ति सम्झौताय् लिच्वः लाइकथंया अभिब्यक्ति मबीत निर्देशन बिउगु दु धकाः एमालेया छम्ह केन्द्रीय नेतां जानकारी बियादीगु दु ।

न्ह्यःने लाःथे न्ववाना जुल कि कन्हय् वनाः एमालेया नेतातय्सं यानाः हे शान्ति सम्झौता भंग जुल धकाः धाइगु अवस्था नं वयेफु धकाः तायेकाः अथे माःगु कथंया निर्देशन बिउगु खः धकाः धाःगु दु ।