फागुन २१ य् संविधानया मस्यौदा वइ मखुत
येँ (सन्ध्या टाइम्स)/वइगु फागुन २१ गते संविधानया मस्यौदा तयार यायेगु धकाः संविधासभां कार्यतालिका दयेकातःगु जूसां अन्ततः व ईया दुने संविधानया मस्यौदा तयार मजुइगु निश्चित जूगु दु ।
संविधानसभाया झिंछगू विषयगत समितिया प्रतिवेदन मध्ये छगू जक समितिया प्रतिवेदनयात प्रतिवेदन अध्ययन समितिपाखें संविधानसभा मार्फत छ्वये धुंकूगु दुसा मेमेगु प्रतिवेदन ला थौं तक नं छ्वःगु मदुनि। अथे फुक्क प्रतिवेदन वनेधुंकाः संवैधानिक समितिइ सहलह ब्याकाः जक संवैधानिक समितिं संविधानया मस्यौदा तयार यायेमाःगु खः। प्रतिवेदन अध्ययन समितिइ हे सहलह क्वचायेके मफुनिगु जुयाः न्हूगु संविधानया मस्यौदा फागुन २१ गते तकया दुने जुइ मखु धकाः नं उगु समितिया छम्ह दुजलं 'सन्ध्या टाइम्स' यात जानकारी बियादीगु दु ।
