दकलय् तजाःगु त्वाः देवा
येँ (सन्ध्या टाइम्स)/नेपाल पर्यटन बोर्डं पर्यटन वर्ष-२०११ यात थप आकर्षक यायेगु निंतिं आः तकया हे दकलय् तःधंगु त्वाःदेवाया दयेकूगु दु ।
सन् २०११ यात पर्यटन वर्षया रुपय् न्यायेकेगु निंतिं थुकिया थीथी तयारी जुयाच्वंगु इलय् बोर्डं पर्यटकत आकर्षित यायेगु ल्याखं दयेकूगु थ्व त्वाःदेवाया मू स्वंगू लख न्यय्द्वः तका जूगु खँ बोर्डं न्ह्यथंगु दु ।
च्यागू फिट जाः दुगु थुगु त्वाःदेवा दयेकेगु निंतिं न, सिजः व लीया समिश्रण याना सछि व चय्प्यंगू किलो धातु छ्यलातःगु दुसा झण्डै लछिया दुने थुकियात तयार याःगु खः ।
थुगु त्वाःदेवाया मेगु आकर्षण धइगु विश्वया सछि व ग्वीन्यागू देय्यात प्रतिबिम्वित यायेगु ल्याखं उलि हे तयातःगु दु। थुगु त्वाःदेवाया उलेज्या वइगु शुक्रवाः कुन्हु जुइगु छगू ज्याझ्वःया दथुइ प्रधानमन्त्री माधवकमार नेपालं उलेज्या यानादी ।
