दक्वं जनजातितय्त सम्मान अधिकार दइ : प्रम
प्रधानमन्त्री माधवकुमार नेपालं न्हापां ल्यूने लाःगु दक्वं जनजातितय्त सम्मान अधिकार दइगु खँ धयादीगु दु ।
मंगलवाः आदिवासि जनजाति उत्थान राष्ट्रिय प्रतिष्ठाया न्हय्क्वःगु संचालक परिषद्या बैठकया उल्लेज्या यानादिसें वयेकलं जातीय विविधतां राष्ट्रिय पहिचान अप्वयइगुलिं संघीय व्यवस्थाय् जाजातितय्सं थःगु अधिकार प्रत्याभुत यायेदइगु धयादिल । प्रतिष्ठानया अध्यक्ष नापं जुयादीम्ह प्रधानमन्त्री नेपालं जनजातिया हितया रक्षा यायेत सरकार प्रतिबद्ध दुगु व उकीयात निंतिं अवश्यक ज्याझ्वलय् तय यायेत प्रतिष्ठानया निर्देशन बियादिल ।
अथेहे ज्याझ्वलय् वयेकलं माओवादीया धम्कीं मग्याइगु धयादिसें माओवादीं जंगल त्वःतुगु यक्व दँ दयेधुंकूगुलिं शिष्ट व्यवहार यायेमाःगु व धम्कीपूर्ण भाय् न्ववाये त्वःतेमाःगु धयादिल । नापं वयेकलं नेपाःया शान्ति प्रकृयायात तार्किक निष्कर्षय् थ्यंकेत व न्हूगु संविधान इलय् हे जारी यायेत सरकार प्रतिबद्ध जूगु धयादिल ।
ज्याझ्वलय् स्थानीय विकासमन्त्री पूर्णकुमार शेर्मा लिम्बुं आदिवासी जनजाति उत्थान प्रतिष्ठानयात बल्लाकेत मन्त्रलय प्रतिबद्ध दुगु व स्थानीय निकायलय् वनीगु बजेट जनजाति विकासय् खर्च यायेगु मन्त्रलयया नीति जूगु धयादिल ।
आदिवासी जनजाति महासंघया अध्यक्ष पासाङ शेर्पां अन्तर्राष्ट्रिय श्रम संगठनया महासन्धि-१६९ कार्यान्वयन यायेत व प्रतिष्ठानया बजेत अप्वयेकेत सरकार नाप माग यानादिल । नेपाल प्रज्ञा प्रतिष्ठानया कुलपति तिलकबिक्रम नेम्वाङं जनजाति उत्थानया निंतिं मां भासं शिक्षा बीमाःगु खँय् बः बियादिल ।
निन्हू तक न्ह्याइगु बैठकय् प्रतिष्ठानया वार्षिक प्रगति प्रतिवेदन, बजेट व नियमावली संशोधन याइगु विषयलय् सहलह जुइगु ज्याझ्वः दु ।
