रचनात्मक भूमिका म्हितेत पार्टी तयार : खनाल
नेकपा (एमाले)या नायः झलनाथ खनालं संविधान च्वयेगु व शान्ति प्रक्रियायात लिच्वलय् थ्यंकेत सरकार प्रतिबद्ध दुसा रचनात्मक भूमिका म्हितेत पार्टी तयार दुगु खँ धयादीगु दु । पार्टी नेतृत्वं ग्वाहालि मयागुलिं सरकारया ज्याखँ प्रभावकारी जुइमफुगु धइगु एमाले बरिष्ठ नेता व प्रधानमन्त्री माधवकुमार नेपालया धापूयात कयाः वय्कलं संविधान दयेकेगुया ग्यारेन्टी यायेत सरकारयात इनाप यानादीगु खः ।
सोमवा: केन्द्रीय समितिया बैठकय् थःगु प्रतिवेदन बारे दुज:तय्सं न्यंगु न्ह्यस:या लिस: बियादिसें वय्कलं पार्टी नेतृत्वयात जक द्वपं बियाः सरकारया भाःलाः पूमवनीगु धयादीगु ख: । राष्ट्रिय सहमतिया विकल्प मदुगु धयादिसें नायः खनालं माओवादीयात ब्यागलं तयाः शान्ति प्रक्रिया पूमवनीगु स्पष्ट यानादिल ।
बैठकय् मू छ्याञ्जे इश्वर पोख्रेलं थ:म्ह बैठकय् पेश यानादीगु संगठनात्मक प्रस्तावय् पिदंगु न्ह्यसःया लिसः बियादीगु खः ।
नायः खनालया राजनीतिक प्रतिवेदन दथुइ न्वंवाःपिं आपालं मू दुजःतय्सं सरकारं प्रभावकारी ज्या यायेमफुगु धयादिसें सरकाया कूंख्युंगु ख: । सरकारया ज्याखँ व माओबादीयात स्वयेगु दृष्टिकोणया विषययात कयाः नं एमालेया केन्द्रिय समितिया बैठकय् कचवं पिहांव:गु खः ।
