सनिलय् निसें स्वनिग:या बजा: चाल
शाहीकालया गृहमन्त्री व जनआन्दोलनया दोषी कथं ठहर जुम्ह कमल थापाया पार्टी राप्रपा नेपालं आह्वान याःगु स्वनिगः बन्द सनिलया न्याताः ईलिपा क्वचाःगु दु । संवैधानिक राजतन्त्र, संघीयता व धर्मनिरपेक्ष राज्यबारे जनमत संग्रह यायेमाःगु लगायत माग तसें याःगु बन्दं येँ, यल व ख्वप:या जनजीवन न्हिच्छियंकं प्रभावित जूगु खः । बन्दया झ्वलय् न्यासः म्ह कार्यकर्ता प्रहरीं ज्वंगु राप्रपा नेपालं दावी दु । प्रहरीं धाःसा स्वसःम्हसित जक ज्वना:गु खँ धा:गु दु ।
राप्रपा नेपालया प्रचार विभाग प्रमुख मोहन श्रेष्ठं पार्टी महामन्त्री टंक ढकाललिसें न्यासःम्ह नेता व कार्यकर्तातय्त प्रहरीं ज्वंगु जानकारी बियादिल । बन्दया झ्वलय् बन्दकर्तातय्सं सातदोबाटोय् बा. १. ज. ४७७४ व बा. १. ज. १८९ ल्याःया ट्याक्सी, ग्वार्कोय् बा. २. ख. २२५८ ल्याःया दुरु ल्हइगु गाडी व कुसुन्तीइ बा. १. ज. २७१८ ट्याक्सी तछ्याःगु खँ ट्राफिक प्रहरीं धा:गु दु ।
