गुलि ल्वाभः उलि हे लडाकु समायोजन : शान्तिमन्त्री
शान्ति मन्त्री रकम चेम्जोङं सरकारं माओवादी नाप गुली ल्वाभः दुगु खः वहे ल्याख्य् माओवादी लडाकु समायोजन याइगु खँ धयादीगु दु । वयेकलं अनमिनं माओवादीया स्वीप्यसः ल्वाभः जक दुगु प्रमाणित या:गु धयादिसें उलि हे लडाकु जक समायोजन यायेफइगु धयादिल ।
सोमवाः येँ जूगु छगू साक्षात्कार ज्याझ्वलय् मन्त्री चेम्जोङं सरकारं लछिया दुने छपू ल्वाभः छम्ह लडाकुया आधारय् समायोजन यायेगु कार्ययोजना दुगु धयादिल । वयेकलं माओवादीया प्यद्वं व च्यासः अयोग्य लडाकु मध्ये नीप्यसः जक बहिर्गमन जूगु खँय् संख्या नं प्वंकादिल ।
अथेहे ज्याझ्वलय् माओवादी स्थायी समिति दुजः देव गुरुङं छम्ह सेना छपू ल्वाभःया आधारय् लडाकु समायोजन याःसाः माओवादीयात मान्य मजुइगु खँ धयादिल । 'छपू ल्वाभः छम्ह सेनाया आधरय् जुइगु समायोजन छुं नं हालतं स्वीकार यायेमखु' वयेकलं धयादिल, 'थ्व शान्ति सम्झौता विपरीत खः ।'
वयेकलं सेनाया ल्याःया निर्घारण मजुनीगु धयादिसें गुलि ल्याख्य् लडाकु समायोजन जुइगु धइगु प्रविधिक विषय जूगु धयादिल ।
ज्याझ्वलय् कांग्रेस प्रवक्ता अर्जुननरिसंह केसीं समायोजन याइपिं लडाकुया ल्याः निधारण यायेगु अधिकार सुं नाप नं मदुगु धयादिसें समायोजन यायेगु ल्याः मापदण्डया आधारय् निर्धारण यायेमाःगु धयादिल । वयेकलं छम्ह सेना छपू ल्वाभः हे विश्वव्यापी मान्यत जूगुलिं थ्वहे आधारय् समायेजन जुइमाःगु धायादिल ।
