सरकारया सहमति बिनाया निणर्य अस्वीकार : पोखरेल
सूचना व संचार मन्त्री शंकर पोखरेलं राजनीतिक रुपं गठन जूगु उच्चस्तरीय राजनीतिक संयन्त्रं छुं नं संवैधानिक निर्णय यायेमफइगु दाबी यानादीगु दु । वयेकलं यदि सरकारया सहमति बिना संयन्त्रं छुं निर्णय याइसाः व सरकारयात अमान्य जुइगु खँ धयादिल ।
चितवनया सौराहलय् प्रेस चौतारी चितवन शाखां या:गु पत्रकार नापलायेगु ज्याझ्वलय् न्ववानादिसें वयेकलं माओवादीया ब्वति बिना न्हूगु संविधान जारी यायेमफइगु धयादिल । वयेकलं संविधानसभाया दकलय् तःधंगु दल माओवादी जूगुलिं संविधान जारी यायेत उगु पार्टीया सहमति आवश्यक जूगु खँ धयादिल ।
सरकारया प्रवक्ता नापं जुयादीम्ह पोखरेलं न्हापानिसें हे माओवादीया ज्याखँ अराजक व अलोकतान्त्रिक जूगु धयादिसें दकलय् तःधंगु दल जुइवं माओवादीं घमण्ड क्यनेमज्यूगु धयादिल । नापं माओवादींया गलत ज्याखँ नं यानाः हे संविधान निर्माण यायेगु ज्या लिबानाच्वंगु द्वपं मन्त्री पोखरेलं बियादिल ।
