नेवाः स्वायत्त राज्य मंकाः संघर्ष समितिया नेतृत्वय् हिउपाः

येँ (सन्ध्या टाइम्स)/संघीय गणतन्त्र नेपाः दुने थःगु म्हसीका नापं पिब्वइगु कथंया नेवाः बाहुल्यता दुगु लागायात नेवाः स्वायत्त राज्य धकाः नेवाः स्वायत्त राज्य मंकाः संघर्ष समितिं घोषणा यायेवं उकिं यानाः नेवाःतय्गु नुगलय् जक मखु नेपाःया आदिवासी जनजातिया नुगलय् तकं छगू कथं मनय् स्वां ह्वयावःगु खः ।

नेवाः स्वायत्त राज्य घोषणा याये धुंकाः मंकाः संघर्ष समिति गुगु कथं नेवाः हक अधिकारया निंतिं सतकय् न्ह्याः वनी धकाः नेवाःतय्सं तायेका वयाच्वंगु खः व कथं धाःसा आःया अवस्थाय् वनाच्वंगु मदु धकाः नेवाःतय्सं महसुस यानाहःगु दु। थ्वहे झ्वलय् आः उगु मंकाः संघर्ष समितिया नेतृत्वय् हिउपाः हयेगु तयारी याःगु दु ।

थ्व ल्याखं स्वयेबलय् नेतृत्वय् समस्या ब्वलंगु खः ला धकाः न्ह्यसः तकं ब्वलना वइगु स्वाभाविक खः ।

न्हापा नेतृत्वया निंतिं मंकाः संघर्ष समितिया दुजः संस्थाया नायःपिं स्वला स्वला पतिकं हिला वनेगु धकाः खँ क्वःछिनातःगु खःसां उगु क्वःछिनायात ब्यवहारय् लागू मयाःगु कारणं समस्या वःगु तायेकाः आः लछि लछिइ हे नायः हिलेगु धकाः तकं खँ क्वःछिउगु खः। न्हापाया क्वःछिना कथं मंकाः संघर्ष समितिया दुजः खलःया नायःपिं मध्ये रोमन लिपिया आधारय् दकलय् न्ह्यःने वइम्हेसिया नांयात नायः दयेकेगु याना वयाच्वंगु खः। वहे आधारय् दकलय् न्हापां नेवाः मुक्ति मंकाः दबूया नायः दिलबहादुर श्रेष्ठ नायः जुल। अबलय् स्वला स्वलां हिलेगु धाःसां वय्कः प्यला तक नायः जुयादीगु खः ।

अनं लिपा नेवाः राष्ट्रिय मुक्ति मोर्चाया नायः हितमान शाक्य नायः जुयादीगु खःसा वय्कः नं प्यला तक नायः जुयादिल। अले नेवाः देय् गुथि नेपाल मण्डलया नायः नरेन्द्रभक्त हाडा नायः जुयादिल। आः अध्यक्ष मण्डल दयेकाः लछि लछिया नायः दयेकेगु खँ क्वःछिउगु दुसा उगु हे कथं मेमेगु खलः पुचःयात नं दुथ्याकाः परिषद दयेकीगु जूगु दु ।

मल्लया संयोजकत्वय् स्थायी समिति
नेवाः स्वायत्त राज्य मंकाः संर्घष समितियात अझ अप्वः व्यवस्थित व प्रभावकारी याना यंकेगु निंतिं नेवाःतय्गु राष्ट्रिय संगठन नेवाः देय् दबूया संरक्षक मल्ल के. सुन्दरया नेतृत्वय् स्थायी समिति दयेकीगु जूगु दु। स्थायी कजिया नेतृत्वय् न्याम्हेसिया उगु समितिया स्थायी दुजः कथं छ्याञ्जे छम्ह व दांभरी छम्ह यानाः स्वम्ह स्थायी जुइ। अले मेपिं निम्ह दुजः छम्ह वहालवाल नायः अले मेम्ह वइम्ह नायः दुजः जुइ। उकिं निम्ह अस्थायी प्रकृतिया जुइसा स्वम्ह जक स्थायी जुइगु जूगु दु ।

मंकाः संघर्ष समितिया स्थायी ज्याकू
नेवाः स्वयत्त राज्य मंकाः संघर्ष समितिया अस्थायी ज्याकूया रुपय् नेवाः देय् दबूया ज्याकू ओमबहालय् तयातःगु खःसा आः स्थायी रुपं हे ज्याकू चायेकीगु जूगु दु। वंगु छुं दिं न्ह्यः जक च्वंगु मुँज्यां येँया ध्वाका बहालय् स्थायी ज्याकू हे चायेकेगु धकाः खँ क्वःहिउगु खः। उगु ज्याकू मंकाः संघर्ष समितिया न्याम्हेसिया स्थायी पुचलं हे संचालन यायेगु खँ तकं क्वःछिउगु दु ।