०४६ साल आन्दोलनया सहिदपिंत लुमंकल
ख्वप (सन्ध्या टाइम्स)/ २०४६ साल फागुन ८ गते ख्वपय् पंचायती शासकं कयेकूगु गोलीं लानाः सहादत प्राप्त याःपिं सहिदतय् लुमन्तिइ थीथी ज्याझ्वः जुल। सुथय् सहिद उद्यान १५ वडाय् च्वंगु न्याम्ह सहिदया मंकाः मूर्तिइ स्वां देछायेगु ज्या जूगु खः। उगु ज्याझ्वलय् नेमकिपाया केन्द्रीय सचिव सुनिल प्रजापति, नेमकिपा ख्वप नगर समितिया अध्यक्ष रविन्द्र खर्बुजा, ४६ सालया घाइते योद्धा राजेन्द्र दुमरुपिंसं न्ववानादीगु खः ।
अथेहे सहिद राजकुमार स्मृति पुस्तकालयया नीदँ बुदिं, सहिद स्मृति सभा व सांस्कृतिक ब्वज्या थनया ब्यासी त्वालय् जुल। ज्याझ्वलय् नेमकिपाया केन्द्रीय सचिव सुनिल प्रजापति, नेमकिपा ख्वप नगर समितिया अध्यक्ष रविन्द्र खर्बुजा, स्थानीय बुद्धिजीवी आसकुमार कोजू व गणेशप्रसाद सुवालपिंसं सहिदया लुमन्तिइ नुगःखँ प्वंकादीगु खः। ज्याझ्वलय् म्येँ व हुलाप्याखं नं न्ह्यब्वःगु खः।
थ्वहे झ्वलय् गोलमढी त्वालय् नं म्हीग बहनी २०४६ सालया सहिदया लुमन्ति मुँज्या जूगु खः ।
२०४६ सालया आन्दोलनय् ख्वपय् राजकुमार सुवाल, कृष्णराम दुवाल, निर्मलकुमार शाक्य व हरिकृष्ण भुजूपिंत गोलीं लागु खःसा ख्वपया पुष्परत्न शाक्य व महेश श्रेष्ठपिं येँय् गोलीं यानाः मदुगु खः। अबलय् न्हापांगु गोली हे ख्वपय् चले जूगु खः ।
