राप्रपा नेपालया स्वनिगः बन्दं जनजीवन प्रभावित
जनआन्दोलन २०६१/६२या इलय् गृहमन्त्री जुयादीम्ह कमल थापां नेतृत्व याःगु राष्ट्रिय प्रजातन्त्र पार्टीं याःगु स्वनिगः बन्दं जनजीवन प्रभावित जूगु दु । राजतन्त्र, हिन्दु राज्य व संघीयताया विषयलयात जनमत संग्रह पाखें क्वःछीमाःगु माग यासें राप्रपा नेपालं बन्द आह्वान याःगु खः ।
बन्दया कारणं स्वनिगःया मूमू सतकय् सवारी साधन चलेजूगु मदुसाः पसः, शिक्षण संस्था, ज्याकू, कलकारखानी आदि बन्द जुयाच्वंगु दु । अथे ख:सां दुनेया सतकय् पसः चालाच्वंगु दुसाः मोटरसाइकल नं चलेजुयाच्वंगु दु । थ्वहे झ्वलय् थीथी थासय् तोडफोड यानाः जूपिं बन्दकर्तातय्त प्रहरीं ज्वंगू दु । राप्रपां धाःसाः थःगु पार्टीया न्यासलं मल्याक कार्यकर्तातय्त प्रहरीं ज्वना यंकूगु दाबी याःगु दु । प्रहरीं शाही शासनकालय् संचार मन्त्री जुयादीम्ह टंक ढकालयात नं ज्वनायंकूगु दु ।
राप्रपा नेपाल संसदीय दलया नेता चन्द्रबहादुर गुरुङं थौंया बन्द इलय् हे संविधान निर्माण यायेत व थहांवनाच्वंगु बजाः भाःया विरुद्ध जूगु खँ धयादीगु दु । नापं वयेकलं थौंया बन्द सनिलय्या न्यता इलय् तक जक जुइगु जानकारी बियादिल ।
स्वनिगः बन्दया निंतिं राप्रपा नेपालं आइतवाः थीथी जिल्लां आपालं कार्यकर्तात येँ हःगु खः । उखे प्रहरीं थौं सतकय् व्यपक रुपं सुरक्षाकर्मीत परिचालन याःगु दु ।
