राज्य व्यवस्था समितिइ प्रम नेपालपाखें स्पष्टिकरण
व्यवस्थापिका संसदया राज्य व्यवस्था समितिं संवैधानिक निकायया पदपुर्ति व सरकारं छुं न्ह्यः दुतहःगु ल्वाभःया विषयस प्रधानमन्त्री माधवकुमार नेपाललिसे स्पष्टिकरण काःगु दु । सत्ताधारी दलया भागवण्डा मिलय् मजुइवं ताःहाकःगु इलंनिसें थीथी संवैधानिक निकायया पद खाली जूगु इलय् नियुक्ति यायेमफुगु कारणया बारे राज्य व्यवस्था समितिं आइतवा: प्रधानमन्त्रीया स्पस्टीकरण काःगु खः ।
सिंहदरवारय् च्वंगु समितिया वैठकय् स्पस्टीकरण बियादिसें प्रधानमन्त्री नेपालं संवैधानीक निकायस रिक्त पदय् नियुक्तिया निंतिं च्वंगु वैठकय् गणपुरक ल्याः मगाःगुलिं समस्या वःगु धयादिल । वय्कलं परिषद्या बिधानय् जूगु व्यवस्थाया कारणं नियुक्ति याये ज्यामिछंगु धयादिसें कार्यविधि हे संशोधन यायेमाःगु न्ह्यथनादिल ।
बैठकय् एकिकृत नेकपा (माओवादी)या सभासदतय्सं सरकारं चाचां भारतपाखें ल्वाभः हयेगुया लिसलिसे माओवादीया केन्द्रीय नेता व पुलांपिं मन्त्रीतय्त नापं बांमलाक्क दायेगु सरकारी नीति स्पस्ट यायेत माग याःगु खः । माओवादी प्रवक्ता नापं जुयाः च्वनादीम्ह समिति दुजः दिनानाथ शर्मां म्हिगः सरकारं हःगु ल्वाभः अनमिनया मातहतय् कन्टेनरय् तयेत सरकारयात सुझाव ब्यूगु दु ।
