संयन्त्रया निर्णय अलमलय्
मंकाः संकल्प प्रस्तावयात आइतवा:या दुने सहमति यायेगु उच्चस्तरीय राजनीतिक संयन्त्रया निर्णय अलमलय् लाःगु दु । निन्हु न्ह्यः च्वंगु संयन्त्रया बैठकं राजनीतिक पंगःयात मंकाः संकल्प प्रस्तावपाखें हे क्वःचायेकेगु धासें कार्यदलयात प्रस्ताव तयार यायेत आइतवा: तकया ई ब्यूगु खः ।
स्वंगू दलीय कार्यदलया दुजः कृष्णप्रसाद सिटौलाया कथं कार्यदलया बैठक च्वनेमफुगुलिं संकल्प प्रस्ताव तयार जुइफुगु मदुनि । कार्यदलं प्रस्ताव तयार यायेमफुगुलिं आइतावाः च्वने धयातःगु उच्चस्तरीय राजनीतिक संयन्त्रया बैठक च्वनेमफुत ।
वंगु शुक्रवा: संयन्त्रया कजि व नेपाली कांग्रेसया सभापति गिरिजाप्रसाद कोइरालाया निवास महाराजगन्जय् च्वंगु संयन्त्र बैठकं मंकाः संकल्प प्रस्तावय् सहलह यानाः राजनीतिक पंगः क्वःचायेकेगु निर्णय याःगु खः । कार्यदलय् माओवादीया नारायणकाजी श्रेष्ठ 'प्रकाश' व देव गुरुङ, काग्रेसया कृष्णप्रसाद सिटौला व अर्जुननरिसंह केसी व एमालेया भरतमोहन अधिकारी व युवराज ज्ञवाली दुजः दु ।
