खस दुने नं जनजातिया विवाद
येँ (सन्ध्या टाइम्स)/खस जाति नेपाःया जनजाति खः लाकि खः लाकि मखु ?
थ्व विषययात कयाः उमि दथुइ नं पाय्छि अज्याःगु हे विवाद पिहां वःगु दु गथे कि छुं दँ न्ह्यः नेवाःतय् दथुइ पिहां वःगु खः। नेवाःत जनजाति खः लाकि मखु धइगु बारे न्हापा विवाद पिहां वः थें आः खसतय् दथुइ थःपिं जनजाति खः लाकि धइगु विवाद पिहां वःगु दु ।
छथ्वः खसतय्सं थःपिं नं जनजाति खः धकाः दावी यासें आदिवासी जनजाति उत्थान प्रतिष्ठानय् थःपिंत नं जनजाति धलखय् दुथ्याकेमाल धकाः निवेदन नापं तयेधुंकूगु दु। थ्व पुचलं खस क्षेत्री समाज धइगु संस्था दयेकाः थ्व अभियान न्ह्याकूगु खः। उमिसं संघीय राज्य निर्माण यायेबलय् थःपिंत नं खस जातिया ल्याखं खसान राज्य बीमाः धकाः दावी याना वयाच्वंगु दु ।
तर मेगु पुचलं धाःसा थःपिं जनजाति मखु धासें थःपिंत वैदिक आर्य पुचलय् तयेमाः धकाः माग यानाच्वंगु दु। जनजाति धलखय् खस जातियात दुथ्याके मजिउ धइगु दावी यानाच्वंगु थ्व पुचः 'खस समाज' धइगु हानं मेगु संस्था चायेकाः न्ह्याः वयाच्वंगु दु। उमिसं खस जातिया लागिं खसान राज्य माः धकाः माग मयाःगु जक मखु नेपालय् हे जातीय राज्य दयेके मजिउ धकाः माग यानाच्वंगु दु। छुं न्हि न्ह्यः तिनि थुमिसं जातीय रुपं प्रदेश निर्माण याये दइ मखु धासें छगू र्याली पिकयाः प्रदर्शन याःगु खः ।
खसतय् लागिं बिस्कं राज्य माः वा म्वाः धइगु खँयात कयाः पिहां वःगु विवादं यानाः खस जातियात नं विभाजित याना बिउगु दु। थःपिंत जनजाति मखु धाइपिं खस पुचलं ब्राम्हण जातिलिसे जानाः मंकाः कार्यक्रम यायेगु तयारी यानाच्वंगु दु। थःत जनजाति धाइपिं खसत धाःसा ब्राम्हण जातिलिसे मसतीगु खँ नं धाःगु दु ।
