राष्ट्रपतिया सैनिक बडिगार्ड हिल
येँ (सन्ध्या टाइम्स)/नेपाली सेनाय् सरुवा बढुवाया विवाद जुयाच्वंगु हे इलय् छुं तःधंगु प्रमुख पदया सैनिक पदाधिकारीतय् पद उखेथुखे याःगु दु ।
न्हूगु सरुवा कथं मेजर जनरल डम्बर गुरुङयात सुदूर पश्चिम डिभिजनपाखें क्युएमजी सरुवा याःगु दु। अथे हे मध्य पश्चिमया प्रदिप जंग थापायात आइजी ज्याकुथी सरुवा याःगु दु ।
थुकिया नापनापं राष्ट्रपति डा.रामवरण यादवया अंगरक्षक नं हिलाबुला जूगु दु। आः अंगरक्षक जुयाच्वंम्ह कुमार बुढाथोकीयात सुदूर पश्चिम छ्वःगु दुसा उकिया थासय् बलदेव राज महत तये हःगु दु ।
उकथं हे प्रबन्ध रथी केशवराज महतयात अनं चीकाः मध्य पश्चिम डिभिजनय् छ्वया बिउगु दु। विनोदकुमार श्रेष्ठयात २४ नम्बर बाहिणी, विनोद बस्नेतयात २३ नम्बर बाहिणी छ्वःगु दुसा इटहरीया चिफ अफ स्टाफय् तेजमानसिंह बस्नेत हःगु दु ।
