बुद्ध मूर्ति सहितया तुं लुया वल

द्वःछिदँ पुलांगु वस्तीया चिं ?

येँ (सन्ध्या टाइम्स)/झापाया दमकय् सलंसःदँ पुलांगु थलबल व बुद्धया मूर्ति नापं दुगु छगः तुं लुया वःगु दु। आपालं ऐतिहासिक महत्वया ज्वलं लुया वःगु जूगुलिं उगु तुंयात ऐतिहासिक थाय्या रुपय् कायेमाःगु खँ स्थानीय मनूतय्सं धया हःगु दु ।

दमक नपा वडा १८ या स्थानीय चिरंजीवी अधिकारीया जग्गाय् उगु तुं लुया वःगु खः। थःगु छेँया लँ दयेकेत गाः म्हूबलय् उगु तुं लुया वःगु खँ धाःगु दु। अन लुया वःगु आपालं थलबल मध्ये छगः थलया दुने बुद्धया मूर्ति लुया वःगु खः। स्वयेबलय् म्हासुगु धातुं दयेकातःगु उगु मूर्तिया धातु धाःसा छु खः धाये मफुनिगु खँ धाःगु दु। अथे खःसां थ्व लुँयागु जुइमाः धकाः अनुमान याःगु दु। तुंथिइ मूर्ति लुया वल धाःगुलिं थौंकन्हय् अन स्वः वइपिं मनूतय् भिड हे जुयाच्वंगु दु ।

थ्व मूर्ति व तुं ग्वःदँ पुलांगु धकाः धायेफुगु अवस्था मदुनि। २०२३ साल न्ह्यः तक उगु थाय् जंगल जुयाच्वंगु खः। तर जंगल जुइ स्वयां नं द्वःछिदँ न्ह्यः उगु थासय् मानव वस्ती दुगु अनुमान याःगु दुसा वहे मानव वस्तीया मनूतय्सं थःपिनि लागिं लः लिकायेत अन तुं म्हूगु जुइमाः धकाः नं अनुमान याःगु दु ।

प्रत्यक्षदर्शीतय्सं धाः कथं अन लुया वःगु तुं नं मेमेगु स्वयां विशेष प्रकारयागु दु। तुंया च्वय्पाखे चायागु थलयागु हे किनारा तयातःगु दु। थथे च्वय्पाखे चायागु हे थलयागु किनारा तयातःगु तुं आः तक गनं नं लुया वःगु मदुनिसा थौंकन्हय् नं सुनां नं अज्याःगु तुं दयेकेगु चलन मदुगु खँ नं स्थानीय सःसिउपिंसं धयाहःगु दु ।