नेवाः राज्यया बारे थवंथवय् सहलह
येँ (सन्ध्या टाइम्स)/राज्य पुनर्संरचना व राज्य शक्तिया बाँडफाँड समितिं लःल्हाःगु १४ गू प्रदेश दुने नेवाः राज्यया रक्षा यायेगु विषययात कयाः थवंथवय् नं सहलह ब्याकेगु ताः तयाः नेवाः जागरण मञ्चं म्हिगः सुथय् छगू कौला ज्याझ्वः यात ।
ज्याझ्वःया शुरुइ जागरण मञ्चया संयोजक सुजीव वज्राचार्यं १४ गू प्रदेश दुने दुथ्याःगु नेवाः लागा बारे नेवाःतय् दथुइ नं थवंथवय् खँल्हाबल्हा जुइमा धइगु ताः तयाः थुगु ज्याझ्वः यानागु जानकारी बिसें ज्याझ्वः न्ह्याकादीगु खः ।
ज्याझ्वलय् नेपालभाषा ख्यःया थीथी व्यक्तित्व नापं मेमेगु नं थीथी ख्यःया नेवाः व्यक्तित्वतय्सं ब्वति काःगु खः। उगु इलय् नापलाःपिं नेवाः सहभागीतय्सं आः नेवाः राज्य धिसिलाकेगु लागिं गय् यानाः न्ह्याः वनेगु धइगु खँय् बिचाः तयादीगु खः ।
