कारोबार वंगु वालय् स्वयां नं क्वय्
येँ (सन्ध्या टाइम्स)/नेपाल स्टक एक्सचेन्जय् थ्व वालय् नियमित शेयर कारोबार मुक्कं प्यन्हु जक जूगु दु। थ्व प्यन्हुया दुने नं सछिगू कम्पनीया शेयर कारोबार जूगु दु। गुकी छवाःया दुने ३३०४ क्वः जूगु कारोबारं झिंछगू करोड चय्गू लख ग्वीखुद्वः तका दां बराबरया निगू लख न्यय्न्याद्वः कित्ता शेयर कारोबार जुल ।
थ्वयां न्ह्यःया वालय् ४७३९ क्वः जूगु कारोबारं स्वंगू लख न्हय्गुद्वः व प्यसः कित्ता बराबरया झिंन्हय्गू करोड ख्वीगू लख न्हय्न्हय्द्वः तका दांया कारोबार जूगु खः। दांया ल्याखं थुगु वालय् वंगु वाःया कारोबारय् स्वयां ३२ दशमलव ९३ प्रतिशतं कारोबार कुहां वःगु दु। वाःया शेयर कारोबारय् दांया लिसें बजार परिसुचक नेप्से नं ७ दशमलव ८८ अंकं कुहां वःगु दु। थुगु वालय् ४९३ दशमलव शुन्य २ अंकं शुरु जूगु शेयर कारोबार वाःया लिपांगु न्हि ४८५ दशमलव १४ अंकय् थ्यंकाः बजाः बन्द जूगु खः ।
अथे हे 'क' वर्गय् लाःगु कम्पनीया कारोबार मापन याइगु सेन्सेटिभ नं १ दशमलव १८ अंकं कुहां वल। वाःया न्हापांगु न्हि ११८ दशमलव ८४ अंकं शुरु जूगु कारोबार लिपांगु न्हि ११७ दशमलव ६६ अंकय् थ्यंकाः बजाः बन्द जूगु खः।
थ्व वालय् नेप्सेय् जूगु कूल कारोबारय् 'क' वर्गय् लाःगु समुहया जक न्हय्गू करोड पीप्यंगू लख तका दां बराबरया कारोबार जूगु दु। थ्व नेप्सेय् जूगू कूल कारोबारया ६३ दशमलव शुन्य ३ प्रतशित खः ।
थ्व वालय् जूगु शेयर कारोबारय् कम्पनीत मध्ये स्वंगू करोड पीच्यागू लख तका दां कारोबार याःगु लिधंसाय् स्टायण्डर्ड चार्टर्ड बैंक पीप्यद्वः कित्ता शेयर कारोबार याःगु लिधंसाय् नेशनल हाइड्रो पावर कम्पनी व दकलय् अप्वः प्यसः व झिंछक्वः तक कारोबार याःगु लिधंसाय् भिवोर विकास बैंक दकलय न्ह्यःने लाःगु दु ।
थ्व छवाःया दुने सरकारी व संस्थागतपाखे छगू नं कित्ता ऋण कारोबार मजू ।
