संविधान निर्माण यायेत म्हो जक ज्या ल्यं दनी : प्रम
प्रधानमन्त्री माधवकुमार नेपालं संविधान निर्माण यायेत आः म्हो जक ज्या ल्यं दनीगु खँ धयादीगु दु । वयेकलं सविधान निर्माणया ज्या स्वीगू प्रतिशत जक ल्यं दनीगुलिं दक्वं पक्ष आः इमान्दारीपूर्वक लगे जुसाः इलय् हे संविधान निर्माण जुइगु खँय् छुं शंकाः मदुगु दाबी यानादिल ।
प्रेस चौतारी नेपालया खुक्वःगु राष्ट्रिय अधिवेशनं निर्वाचित पदाधिकारीत नाप आइतवाः सुथय् नापलायेगु झ्वलय् वयेकलं २०४७ सालया संविधान गुइन्हू दुने तयार जूगु खँ न्ह्यथंनादिसें संकल्प याःसा चीहाकःगु इया दुने नं संविधान निर्माण यायेफइगु धयादिल । वयेकलं शान्ति प्रकृयायात निष्कर्षय् थ्यंकेगु व संविधान च्वयेगु सरकारया प्रमुख दायित्व जूगु धयादिसें दक्वं राजनीतिक दल मिले जुयाः उगु जिम्मेवारी पूवंकेमाःगु खँय् बः बियादिल ।
अथेहे वयेकलं सत्ताय् वनेत नालीगु न्ह्याःगु नं षड्यन्त्रया विधि सफल मजुइगु दाबी यानादिसें बहुमत मदयेकं सुनां नं सरकार गठन यायेमफइगु धयादिल । वयेकलं बहुमत मदयेकं बलजफ्ती शासन सत्ताय् वनेत स्वसाः व अधिनायकवाद जुइगु धयादिल । सहलह या:सा दक्वं समस्याया समाधान पिहांवइगुलिं माओवादीं नं सहमतिलय् वयाः राजनीतिक इमान्दारी क्येनेमाःगु खँय् प्रम नेपालं बः बियादिल ।
प्रेस चौतारीया पदाधिकारीतय्त प्रधानमन्त्री निवास बालुवाटारय् नापलानादिसें वयेकलं प्रेस जगत सरकारया सल्लाहकार जूगुलिं प्रेसजगतया हितविपरित सरकार गवले मवनीगु धयादिल ।
