प्रधानमन्त्री व कोइराला दथुइ खँल्हाबंला
प्रधानमन्त्री माधवकुमार नेपाल व नेपाली कांग्रेसया सभापति गिरिजाप्रसाद कोइराला दथुइ आइतवाः खँल्हाबंला जूगु दु । कोइराला निवास महाराजगंजय् जूगु खँल्हाबंलाय् निम्ह नेतात दथुइ संविधान निर्माण व शान्ति प्रकृयाया बारे सहलह जूगु खः ।
खँल्हाबंलाय् प्रधानमन्त्री नेपालं माओवादीया लडाकु समायोजन व पुनस्थापनाय यायेत सरकारं यानाच्वंगु कुतःया बारे कोइरालायात जानकारी बियादीगु खः । उगु इलय् कोइरालां लडाकु समायोजन व पुनस्थापनाया बारे सरकारया पाखें उच्चस्तरीय राजनीतिक संयन्त्रय् ठोस प्रस्ताव पेश यायेत इनाप यानादीगु खः ।
अथेहे कांग्रेस सभापति कोइरालां माधवकुमार नेपालं नेतृत्व यानादीगु सरकारं गुला पार याःगु लसताय् भिंतुनाः बियादीगु खः । नापं कोइरालां प्रधानमन्त्री नेपाल नेतृत्वया सरकारयात हे कांग्रेसया समर्थन दइगु आश्वासन नं बियादीगु ख: ।
