आपालं ल्याखय् ल्वाभः येँय् दुहांवल
प्रहरीं बल छ्यःवलय् बागू दर्जन स्वयां अप्वः घाःपाः
सरकारं सशस्त्र व नेपाल प्रहरीया निंतिं धासें आपालं ल्याखय् ल्वाभः येँय् दुत हःगु दु । नवलपरासिया बर्दघाटय् च्वंगु युक्ति महाविद्यालयपाखें सशस्त्र प्रहरी मू ज्याकुथिइ तालिमया निंतिं निगः ट्रक ल्वाभः हःगु खँ सरकारं स्वीकार याःगु खः ।
गृह मन्त्रालयस शनिवा: छगू पत्रकार सम्मेलन यानाः गृहमन्त्री भीम रावलं सरकारं आः नं सशस्त्र व नेपाल प्रहरीया निंतिं माःगु ल्वाभः न्यानाच्वंगु व न्यानाः हे च्वनेगु धयादिल । वय्कलं बर्दघाटपाखें थौं हःगु गाडीइ बिष्फोटक ज्वलं दुगु स्वीकार यानादीगु ख: ।
विस्तृत शान्ति सम्झौता कथं नेपाली सेनां जक ल्वाभः हयेमदइगु धयादिसें मन्त्री रावलं शान्ति सम्झौताया उल्लंघन मजुइकथं सरकारी निर्णय कथं ल्वाभः हयाः थुकियात छेकबार यायेत स्वयेगु धइगु देय्या शान्ति सुरक्षाया स्थितिइ पंगः थनेगु लिसें संविधान व कानूनया बिरुद्ध जुइगु खँ वय्कलं धयादिल ।
उखे माओवादी पोलिटव्युरो दुजः जनार्दन शर्मा 'प्रभाकरं' ल्वाभः दुतह:गु धइगु शान्ति विरोधी ज्या जूगुलिं गृहमन्त्रीं याकनं राजीनामा बिइमाःगु माग यानादीगु दु । नेता प्रभाकरं सरकारया थ्व पलाःया प्रतिरोध यायेत जनता व कर्मचारी प्रशासनयात इनाप नापं यानादीगु दु ।
प्रहरीं बल छ्यःवलय् बागू दर्जन स्वयां अप्वः घाःपाः
येँ व धादिङया सीमा नागढुङ्गाय् ल्वाभः दुगु गाडी पनेगु कुतः याःपिं माओवादी कार्यकर्तायात प्रहरीं बल छ्यःवलय् बागू दर्जन स्वयां अप्वः माओवादी कार्यकर्तात घाःपाः जूगु दु । प्रहरीया कठिं दायाः बांमलाक्क घाःपाः जूपिं माओवादी कार्यकर्तात करण, सानुकान्छा लगायतयात येँया बालाजुइ च्वंगु जनमैत्री अस्पतालय् वासः याकात:गु दु । घाःपाः जुम्ह माओवादी कार्यकर्ता करणं थःत ज्वनाः यंकाः प्रहरीं गाडीइ नापं दाःगु जानकारी पत्रकारतय्त ब्यूगु दु ।
अथेहे माओवादी नेता लेखराज भट्ट, अग्नीप्रसाद सापकोटा 'कन्चन', वाईसियल नायः गणेशमान पुन 'रश्मी', केन्द्रीय दुजः दिलिप प्रजापति, जीवन राई लगायत नेतात नं घाःपा जूगु दु । सशस्त्र प्रहरीं भारतपाखें ल्वाभः हःगु धासें माओवादीया कार्यकर्तातय्सं चितवनं निसें ल्यू ल्यू वयाः धादिङया नौबिसेसं गाडी पंगु खः । भारतया सुनौली नाका जुयाः बिस्फोटक ज्वलं नापं युद्धया ज्वलं ज्वनावःगु सशस्त्र प्रहरीया बा. १. ग. १६७६ ल्याःया ट्रक व स्कर्टिङय् दुगु ना. १. झ. ७२९ व ७२५ गाडी वाईसिएलं नियन्त्रणय् काःगु खः ।
चच्छि नौबिसेलय् दिकातःगु गाडी सशस्त्र प्रहरीं शनिवा: बलपूर्वक येँ ह:गु ख: । नौबिसेनिसें थानकोटतकया सतकय् तःधंगु ल्याखय् प्रहरी छ्यःगु खःसा गाडी तप्यंक हे सशस्त्र प्रहरी बल मू ज्याकु हलचोकय् यंकूगु खः । प्रहरीं अनमिनया प्रतिनिधितय्त नापं सशस्त्र प्रहरी बल मू ज्याकुथिइ दुहांवनेत पंगु खः ।
