केन्द्रीय समितिइ स्वीखुम्ह दुजः तनेगु निर्णय
एकीकृत नेकपा (माओवादीं) केन्द्रीय समितिइ स्वीखुम्ह दुजःत तनेगु निर्णय याःगु दु ।
शनिवा: येँ च्वंगु स्थायी समितिया बैठकं समानुपातिक आधारय् केन्द्रीय दुजःतय्गु ल्याः तनेगु निर्णय याःगु खः । स्वीखुम्ह दुजः तनेवं माओवादीया केन्द्रीय समितिइ सच्छि व न्हय्न्याम्ह दुजः दइसा केन्द्रीय समिति बिस्तार जुइधुंकाः पोलिटव्युरो व स्थायी समिति नं स्वतः विस्तार जुइ ।
थुकिया बारे निर्णय यायेत पार्टी ज्याकू कोटेश्वरय् च्वंगु पोलिटव्युरो बैठक क्वचायेधुंकाः हाकनं केन्द्रीय समिति बैठक न्ह्याःगु खः । उगु हे बैठकं केन्द्रीय दुजःतय्गु लिपांगु ल्या: क्वःछीगु ज्या जुइ ।
केन्द्रीय समिति बैठकं स्वलाःया जनपरिचालनया ज्याझ्वः नं क्वछीगु जूगु दु । इलय् हे जनमुखी संविधान मदयेकीगु शंका अप्वःगुलिं दवावमूलक ज्याज्वः हयेत्यंगु जानकारी प्रवक्ता दिनानाथ शर्मां बियादिल । शुक्रवा: च्वंगु स्थायी समितिया अनौपचारिक बैठकं सदन व सतक निगुलिं थासं दवावमूलक संघर्षया ज्याझ्वः यायेगु निर्णय याःसां नं उकिया खाका क्वःछ्यूगु मदुनि ।
