एमाले केन्द्रीय कमिटिया बैठक जारी
सरकारया भूमिका, न्हूगु संविधानय् एमालेया बिचाः लगायतया विषयस आन्तरीक कचवंलय् दुगु नेकपा (एमाले)या केन्द्रीय कमिटिया बैठक प्यन्हुया न्हि नं केन्द्रीय दुज:तय्सं थ:थ:गु बिचा: प्वंकेगु ज्या न्ह्याःगु दु । पार्टी मू ज्याकु बल्खुइ जूगु बैठकय् नायः झलनाथ खनालया राजनीतिक प्रतिबेदनय् थ्व स्वयां न्ह्यः न्वंवाये ल्यंदनीपिं केन्द्रीय दुजःतय्सं थ:थःगु बिचाः तयेगु ज्या जूगु खः ।
प्रतिवेदनय् हे केन्द्रीत जुयाः शनिवा: नं जूगु सहलहस एमाले केन्द्रीय दुजः राजेन्द्र श्रेष्ठं जानकारी बियादीगु दु । वर्तमान अवस्थाय् राष्ट्रिय सहमतिया सरकार दयेकेमाःगु न्ह्यथंसां नं आःया प्रतिवेदन मध्यमार्गी कथंया जूगु नं एमाले श्रोतं जानकारी ब्यूगु दु । म्हिगःया वैठकय् न्वंवाःपिं केन्द्रीय दुजःतय्सं सरकारं जनचाहना कथं ज्या यायेमफुगु व दक्षिणपन्थीपिनिगु योजनाय् वनाच्वंगु बिचाः त:गु ख: । नापं बैठकय् छुंछुं नेतातय्सं प्रधानमन्त्री माधवकुमार नेपालया राजीनामाया माग तकं याःगु खः ।
