फोरमं आइतवाः निर्णायक आन्दोलन घोषणा याइगु
मधेसी जनअधिकार फोरम नेपालया सहअध्यक्ष जयप्रकाशप्रसाद गुप्तां मधेशया मुद्दायात सरकारी पक्षं वास्ता मयाःगु विरोधय् आइतवाः निर्णायक आन्दोलन घोषणा यायेगु खँ धयादीगु दु ।
मधेशी पत्रकार समाजं शनिवाः जनकपुरय् ग्वसाःग्वःगु पत्रकार सम्मेलनय् वयेकलं मधेशया मुद्दायात कांग्रेस, माओवादी व एमालें अस्वीकार यानाः मधेशवादी दलया आन्दोलनय् पगं थनाच्वंगु दाबी यानादिल । वयेकलं व्यवस्थापिका संसदय् एक मधेश एक प्रदेशया माग विरुद्ध प्रमुख स्वंगू दल विपक्षय् दनाः मधेशीयात शक्तिशाली जुयमबीगु षड्यन्त्र यानाच्वंगु द्वपं बियादिल ।
वयेकलं राष्ट्रपतिया निर्वाचनं निसें विभाजित जूपिं मधेशवादी दलत आः नं विभाजित हे जुइगु धइगु दुर्भाग्यपूर्ण खँ जूगु धयादिल । वयेकलं निर्वाचन प्रणाली, भाषिक अधिकार व पहिचानया सम्बन्धय् मधेशवादी दलया प्रस्तुती अत्यन्त कमजोर जूगु खँ दुःखदायी जूगु बिचाः प्वंकादिल ।
