सशस्त्रया गाडीइ सेनाया निंतिं ल्वाभः: माओवादी
ल्वाभः हयेत बन्देज मुद : गृहमन्त्री
एनेकपा (माओवादीं) सशस्त्र प्रहरीया गाडीलय् सेनाया निंतिं ल्वाभः हःगु द्वपं ब्यूगु दु । माओवादी स्थायी समितिया शनिवाः सुथय् च्वंगु बैठकं ल्वाभः हःगु खँयात गम्भीर रुपं कासें उकीया भर्त्सना याःगु दु ।
बैठक लिपाः पत्रकारत नाप खँल्हाबंला यानादिसें माओवादी प्रवक्ता दीनानाथ शर्मां शान्ति प्रकृयाया विपरीत नियोजित ढंगं ल्वाभः हःगु ठहर बैठकं याःगु कनादिल । वयेकलं अनमिन लगायत मानवअधिकारवादी संस्थायात मक्यंसें बल प्रयोग यानाः हःगुलिं उकी ल्वभः हे जूगु पुष्टि जूगु कनादिल ।
उखे सिहंदरवारय् छगू पत्रकार सम्मेलन यानाः गृहमन्त्री भीम रावलं गृहमन्त्रालय अन्तर्गतया नेपाल प्रहरी, सशस्त्र प्रहरी व राष्ट्रिय अनुसन्धान विभानया निंतिं ल्वाभः हयेत छुं नं कथंया बन्देज मदुगु खँ धयादीगु दु । वयेकलं देशय् शिन्ति सुरक्षा कायम यायेत आवश्यक जुइगुलिं थुकीयात माओवादी लगायत सुनां नं विरोध यायेमाःगु आवश्यकत मदुगु खँ धयादीगु खः ।
शुक्रवाः बहनीं सशस्त्र प्रहरीया गाडीइ तःधंगु ल्याख्य् ल्वाभः येँ ह:गु ख: । माओवादी कार्यकर्तातय्सं उकी ल्वाभ: दुगु धासें धादिङया नौबिसेलय् दिकातःगु बा. १. ग. १६७६ नम्बरया ट्रकयात प्रहरीं बल छ्यलाः येँ हःगु खः । ट्रक येँ वयेत्यंगु इलय् माओवादी कार्यकर्तातय्सं विरोध यायेगु झ्वलय् प्रहरीं बल छ्यःगु खःसा उगु इलय् छुंछुं माओवादी कार्यकर्तात घाःपाः जूगु खः । ट्रकयात आः सशस्त्र प्रहरीया मू ज्याकी हलचोकय् तयातःगु दु ।
