संविधान जारी याये न्ह्यः लडाकु समायेजन : निधि

नेपाली कांग्रेसया महामन्त्री विमलेन्द्र निधिं माओवादी लडाकुया व्यवस्थापन व समायेजन मजुतल्ले न्हूगु संविधान निर्माण व शान्ति प्रकृयां पूर्णता मकाइगु खँ धयादीगु दु । शान्ति प्रकृयायात सार्थक निष्कर्षय् थ्यंकेत माओवादी लडाकुया पुनःस्थापना व समायोन यायेमाःगु खँय् वयेकलं बः बियादीगु खः ।

नेपाल वित्तिय संस्था कर्मचारी संघ राष्ट्रिय वाणिज्य बैंक मिमिटेड नारायणी व जनकपुर क्षेत्रीय समितिया न्हय्क्वःगु अधिवेशन समारोहयात शनिवाः विरगंजय् सम्बोधन यानादिसें वयेकलं छवाःया दुने राजनीतिक दलत दथुइ सहमति मजुसाः निर्धारित इलय् संविधान निर्माण जुइमफइगु धयादिल । वयेकलं निर्धारित इलय् हे संविधान निर्माण यायेगु खःसा प्रमुख स्वंगू दलत दथुइ छवाःया दुने सहमति जुइमा:गु धयादिल ।