संघीयतां फुक्क जातजातितय् भावना थनीगु प्रमया विश्वास

प्रधानमन्त्री माधवकुमार नेपालं संघीयतां फुक्क जात-जाति व भाषा-भाषीत दथुइ राष्ट्रियताया भावना थनीगु विश्वास प्वंकादीगु दु । थीथी जात-जाति व भाषा-भाषी, क्षेत्र, समुदाय व वर्गया जनता राष्ट्रिय एकता व सार्वभौमिकताया प्रतिक जूगु धयादिसें वय्कलं उमित ब्यागलं तःगु धइगु भावनापाखें मुक्त यायेमाःगु खँय् ब: बियादीगु दु । प्रम नेपालं देय् सङ्क्रमणकालपाखें न्ह्यानाच्वंगु इलय् छगू जातिया विरुद्ध मेगु जातियात छ्यलेगु थेंज्याःगु षडयन्त्रपाखें देशय् अराजकता व अन्यौल पिज्वये फइगुलिं फुक्कसित सचेत जुयाच्वनेत इनाप यानादीगु दु ।

खुइक्वःगु प्रजातन्त्र दिवसया लसताय् सैनिक म‌ञ्च तिंख्यलय् ग्वसाःग्वःगु विशेष ज्याझ्वलय् न्वंवानादिसें प्रधानमन्त्री नेपालं क्वःछीनात:गु इलय् जनताया आज्जु कथंया न्हूगु संविधान दयेकेमाःगु धयादिल । वय्कलं संघीय लोकतान्त्रिक गणतन्त्रयात संस्थागत यायेत दलत दथुइ सहमति व सहकार्यलय् ब: बियादिल । आर्थिक समृद्धिं स‍ंघीय लोकतान्त्रिक गणतन्त्रयात फुक्क कथंया ग्याःचिकूपाखें मुक्त यायेफइगु विश्वास प्वंकादिसें वय्कलं आःया मू कार्यसूची आर्थिक समृद्धि हे जुइमाःगु बिचाः तयादिल ।

२००७ सालया प्रजातान्त्रिक आन्दोलनया फलस्वरुप सच्छि व प्यदँ ताःहाकःगु निरकुंश जहानीया राणाशासन क्वचाःगु लुमन्तिइ हरेक दँया फागुन ७ यात प्रजातन्त्र दिवस कथं हनावयाच्वंगु खः ।