'पूर्व बिदा, बन्द व हड्ताल आर्थिक विकासय् पंग'
अर्थमन्त्री सुरेन्द्र पाण्डें नेपाःया आर्थिक विकासय् प्रत्येक लाय् जुइगु बन्द व हड्ताल व पूर्व बिदां तःधंगु पंगः थंनाच्वंगु खँ धयादीगु दु । वय्कलं पूर्व बिदा दच्छिया झिंन्यान्हू स्वयां अप्वः जुइमज्यूगु व छक्वःपतिकं जुइगु बन्द, हड्तालयात न्ह्याबलेंया निंतिं दीकेमाःगु बिचाः प्वंकादिल ।
ख्वपया बोडेस नेपाल जेसिसं शुक्रवा: ग्वसाः ग्वःगु निन्हूया लिडरसीप भेलाया उलेज्या यानादिसें वय्कलं आर्थिक विकासया निंतिं ल्याय्म्हपिंसं आर्थिक क्रान्ति न्ह्याकेमाःगु धयादिल । जग्गा छ्यःगुया आधार प्रणाली हयेगु धयादिसें अर्थमन्त्री पाण्डें आः जमिन छ्यःगु आधारय् फ्यायेमाःगु बिचा: प्वंकादिल । देशय् चारलेनया राजमार्ग दयेकाः नीगू निसें नीन्यागू शहर दयेकेमाःगु धयादिसें वय्कलं आः सतक विभागं गनं लँ वनि अनं छेँय् दयेकेकमाःगु व गनं छेँय् दयेकाः बस्ती विकास यायेफइ अनं सतक यंकेमाःगु धयादिल ।
ज्याझ्वलय् मन्त्री पाण्डें तःधंगु शहरया विकास यानाः नीगू प्रतिशत मुनाफा सरकारयात बिइगु व उगु ध्यबा सरकारं सुकुम्बासीया बस्ती विकासया निंतिं छ्यलेगु धयादिल ।
