एमाले केन्द्रीय समिति बैठकय् नेतातय्सं न्ववायेगु क्रम जारी
सत्ताया नेतृत्व यानाच्वंगु दल नेकपा (एमाले)या न्ह्यानाच्वंगु केन्द्रीय समिति बैठकय् राज्यया पुनःसंरचनाया विषयस थ:गु पार्टीं काःगु निर्णयया विषयस नेतातय्सं सभासद् व नेतृत्वया कूंखिनेगु ज्या जूगु दु ।
शुक्रवा:या बैठकय् न्वंवानादीपिं आपालं दुजःतय्सं राज्य पुनंर्संरचनाय् राजनैतिक अग्राधिकार व जातीय राज्यया नामाकरणया विषययात कयाः कूंख्युंगु खः । दलया सभासदत निगू ब्व जुइगु धइगु तसकं कमजोर जूगु धयादिसें केन्द्रीय दुजःतय्सं कूंख्युंगु खः । अथेहे केन्द्रीय दुजःतय्सं नायः झलनाथ खनालं न्ह्यब्वयादीगु राजनैतिक प्रतिवेदन सन्तुलीत खनेदुसां नं सतही व पूमवंगुलिं उकीयात पूवंकेमा:गु खँय् ब: ब्यूगु दु ।
अथेहे बैठकय् सरकारया ज्या व कारवाहीयात कयाः नं नेतातय्सं कूंखिनेगु ज्या जूगु खः । छम्ह दुजःयाकथं बैठकय् गृहमन्त्री नापं जुयाच्वनादीम्ह भीम रावलं सरकारया ज्याया बारे जानकारी बियादीगु खः । बैठकय् सरकार हिलेगु पक्षय् मदुसां नं सरकार स्वयां संविधान तःधं जूगुलिं उकीया विकल्प बिचा: यायेमा:गु खँय् नेतातय्सं ब: ब्यूगु ख: । संस्थापन पक्षया केन्द्रिय दुजःतय्सं जातीय राज्यं ल्वापू अप्वयेकेगु धयादिसें विरोध यानाच्वंगु दुसा जनजाति पृष्ठभुमि दुपिं नेतातय्सं जातीय राज्यं जनजातिपिनिगु अधिकारयात सुरक्षित यायेगु खँ तयाच्वंगु दु ।
