स्वलाःया कार्ययोजना ठोसरुपं न्ह्यःने न्ह्याइ : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' पार्टीया स्वलाःया कार्ययोजना ठोसरुपं न्ह्यःने न्ह्याकेगु खँ धयादीगु दु ।
शुक्रवा: येँय् पार्टीया सेती-महाकालीया कार्यकर्तात दथुइ या सहलहस उगु वय्कलं उगु खँया जानकारी बियादीगु खः । आःया स्वलाःया कार्ययोजना अमूर्त मजूगु धयादिसें वय्कलं विचारधारात्मक उचाइया निंतिं पार्टीया छगू जक मुखपत्र पिकयाः व्यक्ति व्यक्तिपाखें जुइगु प्रकाशन बन्द यायेगु तयारी जुयाच्वंगु स्पष्ट यानादिल ।
अथेहे वय्कलं जिल्लास्तरतकया प्रशिक्षण नं लच्छिया दुने हे हेडक्वार्टरपाखें क्वचायेकेगु धयादिल । माओवादीं प्रस्ताव याःगु राज्य पुनर्संरचनाया खाकापाखें प्रतिक्रियावादीत ग्या:गु धयादिसें वय्कलं जनताया संविधान दयेके चाहे जूपिं व मजूपिं दथुइ लिपांगु संघर्ष जुइत्यंगु धयादिल । वय्कलं जलस्रोत, पर्यटन, उद्योग व जडीबुटीया आधारय् आःया केन्द्र सुदूरपश्चिम जुइगु धयादिसें थारुवान व सेती-महाकालीया सीमांकन यायेबलय् सहमतिया आधारय् नामांकन, सीमांकन व मनोविज्ञान मिलये यायेमाःगु खँ स्पष्ट यानादिल ।
