पार्टीइ अनुशासन हिनता अप्वयावंन : सुशील
नेपाली कांग्रेसया कार्यवाहक सभापति सुशील कोइरालां लिपांगु इलय् पार्टीइ अनुशासन हिनता अप्वयावंगु खँ स्वीकार यानादीगु दु । वय्कलं पार्टी केन्द्रीय ज्याकुथिइ कांग्रेस कार्यकर्तातय्सं थः हे नेतायात या:गु आक्रमणं अनुशासन हिनता अप्वयाः वंगु पुष्टि याःगु धयादिल ।
अथेहे कांग्रेसया केन्द्रीय दुजः नरहरी आचार्यं वइगु जेठ १४ गतेदुने न्हूगु संविधान जारी जुइमफइगु दाबी यानादीगु दु । चितवनया भरतपुरय् शुक्रवा: ग्वसाः ग्वःगु लोकतान्त्रिक संविधान दयेकेगुलिइ खनेदुगु हाथ्या व ज्यंकेगु विषयस विचाः गोष्ठीइ नेता आचार्यं संविधान दयेके न्ह्यः जनतां उकिया बिषयस सहलह यायेदयेमाःगु धयादिल । संविधानसभाया निर्वाँचनय् दलतय्सं सार्वजनिक याःगु घोषणा पौयात आधार दयेकाः सहलह याःसा सहमति यायेत अःपुइगु धयादिसें वय्कलं उकिया संयोजन कांग्रेसं जक यायेफइगु दाबी यानादिल ।
