बहुप्रदेशया नितिं थारूतय् आन्दोलन शुरु
येँ (सन्ध्या टाइम्स)/थरुहट�तराईयात छगू हे प्रदेश दयेकाः कथित मधेसवादी नेतातय्सं यकःति शासन यायेगु षडयन्त्र याःगु ठहर यासें थारु समुदायया च्यागू संगठनं तराई लागाय् बहुप्रदेशया माग यासें आन्दोलन न्ह्याकेगु घोषणा याःगु दु ।
संविधानसभाया राज्य पुनर्संरचना नापं राज्य शक्ति बाँडफाँड समितिपाखें तराईयात निगू प्रदेश दयेकेगु प्रस्ताव तःगु खःसा आः उकियात नं क्वपालाः छगू जक प्रदेश दयेकेगु षडयन्त्र जुयाच्वंगु दु धासें थारूतय्सं आन्दोलनया घोषणा याःगु खः ।
थारू कल्याणकारिणी सभा, थरुहट संयुक्त संघर्ष समिति, नेपाल लोकतान्त्रिक थारू संघ नापं थीथी थारू मोर्चात जानाः घोषणा याःगु आन्दोलन कथं फागुन २० गते जिल्ला प्रशासन ज्याकू मार्फत संविधानसभायात ज्ञापनपत्र लःल्हायेगु, २१ गते संविधानसभा घेराउ यायेगु, २५ गते जिल्ला जिल्लाय् सभा यायेगु ग्वसाः दयेकातःगु दु। अथे हे २९ गते मसाल जुलुस पिकाइगु नापं चैत्र १ गते थरुहट�तराई आम हडताल याइगु जूगु दु ।
