मंकाः संकल्प प्रस्ताव निन्हूया दुने तयार याइगु
राजनीतिक गतिरोध अन्त्यया निंतिं आइतवाः तकया दुने मंकाः संकल्प प्रस्तावयात अन्तिम रुप बियाः सहमति यायेगु खँय् स्वंगू प्रमुख राजनीतिक दलत सहमत जूगु दु ।
शुक्रवाः सुथय् च्वंगु उच्चस्तरीय राजनीतिक संयन्त्रया बैठकं मंकाः संकल्प प्रस्ताव मार्फत हे गतिरोधया अन्त्य यानाः मेमेगू विषयलय् दुहांवनीगु निष्कर्ष पिकासें संकल्प प्रस्तवयात आइतवाः दुने अन्तिम रुप बीगु सहमति याःगु खः । बैठक लिपाः नेतातय्सं वइगु फागुन ९ गते च्वनीगु संयन्त्रया बैठकं संकल्प प्रस्तावय् सहमति याइगु कनादिल ।
बैठकं स्वंगू दलं ल्ह्वं थःथःगु माग कथं सुयातं आछेप मलाइगु भाय् छ्यलाः प्रस्ताव तयार यानाः संयन्त्रया मेगू बैठकय् पेस यायेत स्वंगू दलया कार्यदलयात जिम्मा ब्यूगु दु । स्वंगू दलया निम्ह-निम्ह दुजः दुगु कार्यदलयात संयन्त्रं थ्व मस्यौदा तयार यायेगु जिम्मा ब्यूगु दु । संकल्प प्रस्तावया मस्यौदाय् सहमति जुइकाः तिनि संविधान निर्माण, शान्ति प्रकृया व मेमेगू विषयस दुहांवनेफइगुलिं संकल्प प्रस्तवाय् न्हापा सहमति यायेगु निर्णय बैठकं याःगु खः ।
बैठकय् संयन्त्रया संयोजक नापं कांग्रेस सभापति गिरिजाप्रसाद कोइराला, माओवादी अध्यक्ष पुष्पकमल दाहाल 'प्रचण्ड', एमाले अध्यक्ष झलनाथ खनाल लगायत नेतातय् उपस्थिति दुगु खः । संयन्त्रया अमन्त्रित दुजः प्रधानमन्त्री माधवकुमार नेपाल धाःसाः बैठकय् उपस्थित जुयामदी ।
