माओवादीं विद्रोहया निंतिं तयार जुइत कार्यकर्तातय्त निर्देशन
एकीकृत नेकपा (माओवादीं) जनमुखी संविधान दयेकेगु निंतिं छधी जुयाः न्ह्यःज्यायेत कार्यकर्तातय्त निर्देशन ब्यूगु दु । जनमुखी संविधान च्वयेगुलिइ पंगः वःसा विद्रोहया निंतिं नं तयार जुयाच्वनेत नापं माओवादीं थः कार्यकर्तातय्त निर्देशन ब्यूगु दु ।
ख्वपया खरिपाटीस च्वंगु नेपाल विद्युत प्राधिकरणय् ग्वसाःग्वःगु प्रशिक्षण भेलाय् माओवादीया नायः पुष्पकमल दाहाल 'प्रचण्ड', बरिष्ठ न्वकू मोहन वैद्य 'किरण', न्वकु डा. बाबुराम भट्टराई व नारायणकाजी श्रेष्ठ 'प्रकाशं' प्रशिक्षणया झ्वलय् निर्देशन बियादीगु खः । प्रशिक्षण बिइगु ज्या क्वचायेवं कार्यकर्तापिनिगु न्ह्यसःया लिस: नायः प्रचण्डं बियादीगु खः ।
कार्यकर्तापिनिगु लिसः बिइगु झवलय् नायः प्रचण्डं शान्ति प्रक्रियायात लिच्वलय् थ्यंकूसें जनमुखी संविधान दयेकेगु पार्टीया मू ज्या जूगु धयादिल । जनमुखी संविधान च्वयेगु ज्याय् पंगः वःसा विद्रोहया लुखा चालाच्वंगु धयादिसें वय्कलं क्रान्तिइ पंगः मवइगु धयादिल । माओवादीया हे नेतृत्वय् न्हूगु जनवादी क्रान्ति ताःलाइगु नं वय्कलं धयादिल ।
नायः प्रचण्डं पार्टी एमालेकरण जुयाः वनाच्वंगु धइगु धापू गलत जूगु धयादिसें माओवादीं हे क्रान्तियात निर्णायक लिच्वलय् थ्यंकाः हे त्वःतेगु प्रतिवद्धता प्वंकादिल । जेठ १४ गते दुने संविधान मदयेकेगु षड्यन्त्रय् मेमेगु दलत न्ह्यःज्यानाच्वंगु धयादिसें वय्कलं क्वःछीगु इलय् संविधान मदयेकूसा: नेपालय् विद्रोह पक्का दुगुलिं उकिया निंतिं स्वलाःया दुने ठोस योजना हयेगु प्रतिबद्धता प्वंकादिल ।
अथेहे बरिष्ठ न्वकू किरणं 'जनताया संघीय लोकतान्त्रिक गणतन्त्र' पार्टीया मू कार्यनीति जूगु धयादिसें थुकिया लक्ष तक थ्यंकेत अविचलित जुयाः संघर्ष न्ह्याकाच्वनेत कार्यकर्तातय्त निर्देशन बियादिल । अथेहे न्वकूत भट्टराई व प्रकाशं संविधान दयेकेगु व शान्ति प्रकृयायात लिच्वलय् थ्यंकेमाःगु अडानय् पार्टी दृढ जूगु धासें राष्ट्रिय स्वाधिनता व नागरीक सर्वोच्चताया आन्दोलनयात सशक्त दयेकेत कार्यकर्तातय्त निर्देशन बियादिल ।
म्हिगःनिसें न्ह्याःगु न्ह्या:गु उगु प्रशिक्षण भेलाय् राज्य समितिस्तरया थ्यंमथ्यं पीन्यासः कार्यकर्तातय्गु ब्वति दुगु खः । थ्वहे झ्वलय् केन्द्रीय समिति बिस्तारया बिषयस कन्हय् च्वनीगु स्थायी समिति बैठकं निर्णय यायेगु माओवादीं जानकारी ब्यूगु दु ।
