माओवादी विकास विरोधी : प्रधानमन्त्री
'जलविद्युत आयोजनाय् याःगु पंगः सत्ताय् वनेगु बार्गेनिङ'
प्रधानमन्त्री माधवकुमार नेपालं संचार उद्यमी जमीम शाहया हत्याय् सरकारया कमजोर स्वीकार यानादिसें आःया दिंस अज्याःगु घटना जुइमबीकेगु प्रतिवद्धता प्वंकादीगु दु । जमीम शाहया हत्यारां सुख मसीगु धयादिसें वय्कलं शान्ति सुरक्षा कायम यायेत न्ह्यात्थेंज्याःगु पलाः ल्ह्वनेत नं सरकार तयार दुगु धयादिल ।
थनिनिसें येँय् न्ह्याःगु घरेलु प्रदर्शनीया उलेज्या ज्याझ्वलय् न्वंवानादिसें वय्कलं एकीकृत नेकपा (माओवादीं) विकास यायेगु ज्याय् पंगः थंना देय्यात ख्यूंगु थासय् घ्वायेत स्वःगु द्वपं बियादिल । विकास यायेगु ज्याय् राजनीति दुमथ्याकेत नापं वय्कलं माओवादीयात सुझाव बियादिल । प्रधानमन्त्री नेपालं शान्ति सम्झौता अःखः माओवादीं चन्दा आतंक न्ह्याकाच्वंगु द्वपं नापं बियादिल ।
'जलविद्युत आयोजनाय् याःगु पंगः सत्ताय् वनेगु बार्गेनिङ'
अथेहे थनिनिसें बुटवलय् न्ह्याःगु नेपाल बिद्युत प्राधिकरण कर्मचारी संघया न्हय्क्वःगु केन्द्रिय परिषद् भेलाय् न्वंवानादिसें उर्जामन्त्री डा. प्रकाशशरण महतं माओवादीं भारतया लगानीइ जुइत्यंगु जलविद्युत आयोजनाय् याःगु पंगः नं सत्ताय् वनेगु बार्गेनिङ जूगु बिचाः प्वंकादिल । वय्कलं माओवादीं संविधान दयेकेगु ज्यायात पंगः थनाः सत्ताय् वनेगु मुद्दायात प्राथमिकता ब्यूगु द्वपं नं बियादिल।
वय्कलं जलविद्युत आयोजनाय् याःगु पंगःपाखें अन्तर्राष्ट्रिय लगानीकर्तां नेपालय् लगानी मयाइगु धयादिल ।
