सरकारय् पार्टीया भूमिका प्रभावकारी जुइमफुत : एमाले
सत्ता नेतृत्व यानाच्वंगु नेकपा (एमाले)या नेतातय्सं सरकारय् पार्टीया भूमिका प्रभावकारी जुइमफुगु धासें सरकारया नं कूंख्यूगु दु । नापं उमिसं सरकारयात थःगु हे पार्टीपाखें ग्वाहालि मदगु खँ धा:गु दु ।
येँय् न्ह्याःगु केन्द्रीय समितिया बैठकय् नायः झलनाथ खनालया राजनीतिक प्रतिवेदनया बारे बिचाः प्वंकूसें एमाले केन्द्रीय दुजःतय्सं पार्टीया हे नेतातय्सं सरकारयात ग्वाहालि मयाःगु द्वपं ब्यूगु खसा: सुं सुं दुजःतय्सं सत्ता साझेदार दलतय्सं एमालें सरकार एकलौटि रुपं न्ह्याकाच्वंगु द्वपं बिलं नं पार्टीं सशक्त भूमिका म्हितेमफुगु धासें कूंख्यूगु दु ।
पार्टी मू ज्याकु बल्खुइ च्वंगु थौंया बैठकय् भरतमोहन अधिकारी, केशब बडाल, रघुबीर महासेठ, घनश्याम भुसाल, भानुभक्त ढकाल लगायत झिंखुम्ह केन्द्रीय दुजःतय्सं थःथःपिनिगु बिचाः प्वंकादीगु खः । बैठकय् नायःया राजनीतिक प्रतिवेदन व पार्टी नियमावली दथुइ छक्वलं सहलह जूगु खः ।
