राष्ट्रपति यादव नेपा: लिहांझाल
राष्ट्रपति डा. रामवरण यादव प्यन्हून्यंकया भारत भ्रमण क्वचायेकाः बिहीवाः नेपाः लिहांझायादीगु दु । बिहीवाः सनिलय् वयेकल नेपाल वायुसेवा निगमया विमानं नेपाः लिहांझायादीगु खः । नीन्हय्म्ह प्रतिनिधिमण्डलया नेतृत्व यानादिसें राष्ट्रपति यादव वंगु फागुन ३ गते भारत प्रस्थान यानादीगु खः ।
त्रिभुवन अन्तर्राष्ट्रिय विमानस्थलय् पत्रकारत नाप खँल्हाबंला यानादिसें वयेकलं थःगु भारत भ्रमण लोकतन्त्र व शान्तिया निंतिं सदभावना भ्रमण जूगुलिं निगू देय् दथुइया स्वापू थप सुढृद जुइगु प्रतिक्रिया बियादिल । वयेकयात लसकुस यायेत उपराष्ट्रपति परमानन्द झा, प्रधानमन्त्री माधवकुमार नेपाल, मन्त्रीत लगायत उच्च सरकारी अधिकारीत विमानस्थल थ्यंकूगु खः ।
प्यन्हूया भ्रमणया झ्वलय् नेपाः व भारत दथुइ स्वंगू सम्झौता व छगू समझदारी पत्रय् ल्हाःचिं तयेगु ज्याः जूगु खः । भ्रमणया झ्वलय् वयेकलं थः भारतीय समकक्षी प्रतिभा पातिल, भारतीय प्रधानमन्त्री मनमोहन सिंह, विदेशमन्त्री एसएम कृष्णा, कांग्रेस आईया अध्यक्ष सोनीया गान्धी, भारतीय विपक्षी दल भारतीय जनता पार्टीया नेता लालकृष्ण आडवाणी, भारतीय कम्युनिष्ट पार्टीया नेता सीताराम यचुरी लगायत उच्च सरकारी अधिकारी व नेतातय्त नापलानादीगु खः ।
बिहीवाः नेपा: लिहांझाय् न्ह्य: वयेकलं न्हू दिल्ली च्वंगु अक्षरधामय् पूजा अर्चना यानादीगु खः । नापं वयेकलं बिहीवाः हे अखिल भारतीय आयुर्विज्ञान प्रतिष्ठानय् मिखा परीक्षण यानादीगु खः । वयेकलं बुधवाः हरिद्वारय् कुम्भ मेलाय् ब्वति कयादीगु खः ।
