पत्रकार सिंहया हत्या विरुद्ध थौं सभा व र्याली
जनकपुरय् हत्या जूम्ह पत्रकार उमा सिंहया अन्त्येष्टि थौं जनकपुरय् याइगु जूगु दु । थौं शवयात्रा यासें अनया स्वर्गद्वारी धाःगु थासय् वय्कःया अन्त्येष्टि याइगु ग्वसाः दु । म्हीग बहनी अज्ञात पुचलं वय्कःयात लाथेपाथे खुकुरीं पालाः स्याना बिउगु खः ।
पत्रकार सिंहया हत्या विरुद्ध मधेशया फुक्कं पत्रकार तय्सं अनिश्चितकालीन जनकपुर बन्दया घोषणा याःगु दु । अनया पत्रकारतय्सं गृहमन्त्री स्वयम् उपस्थित जुयाः पत्रकारतय् सुरक्षाया ग्यारेन्टी मबिउतले बन्द लितमकायेगु खँ धाःगु दु ।
अथे हे पत्रकार सिंहया हत्याया विरोधय् जनकपुरया फुक्कं रेडियो व पत्रिकातय्सं वय्कःया हत्या सम्बन्धी सामग्री बाहेक मेगु फुक्कं समाचार बन्द याःगु दु ।
पत्रकार सिंहया लुमन्तिइ थौं नेपाल पत्रकार महासंघं देय्न्यंकं शोक सभा याइगु जूगु दु । येँय् संचारग्रामय् महासंघं शोक सभा याइ ।
अथे हे महिला मानव अधिकार रक्षक राष्ट्रिय संजालं पत्रकार सिंहया हत्याया विरोधय् थौं न्हूगु वानेश्वरं विरोध र्या ली पिकायेत्यंगु दु ।
