'जनआन्दोलन चैत्र २४ लिपा जनविद्रोह'
येँ (सन्ध्या टाइम्स)/थ्वहे वइगु चैत्र २४ गते लिपा थःपिंसं थौंकन्हय् न्ह्याकाच्वनागु जनआन्दोलनयात जनविद्रोहया रुपय् विकास यायेमाःगु जूगुलिं न्याद्वः कार्यकर्तायात तयार जुया च्वँ धइगु निर्देशन बिसें माओवादीया म्हिगःनिसें शुरु जूगु केन्द्रीय प्रशिक्षण भेला थौं क्वचायेत्यंगु दु ।
माओवादीया राज्य समितिया दुजः तक दुथ्याकाः न्ह्याकूगु उगु केन्द्रीय प्रशिक्षण ज्याझ्वलय् माओवादी अध्यक्ष प्रचण्ड, वरिष्ठ नेतात मोहन वैद्य, डा. बाबुराम भट्टराई नापं मेमेपिंसं प्रशिक्षण बीगु ग्वसाः दु ।
कार्यकर्तातय्गु खँ न्यनेधुंकाः नेतातय्सं प्रशिक्षण बीगु झ्वलय् जनविद्रोहया निंतिं न्ह्यानाच्वंगु जनआन्दोलनयात उच्च तहलय् तक थ्यंकेगु जुइ धकाः खँ तयादीगु खँ धाःगु दु।
माओवादी पार्टीं आः तत्कालया निंतिं महाधिवेशन सिबें नं केन्द्रीय प्रशिक्षणया आवश्यकता दु धइगु तायेकाः ख्वपया खरिपाटीइ उगु प्रशिक्षण ज्याझ्वः न्ह्याकूगु खः ।
पार्टी दुने 'जनताया संघीय लोकतान्त्रिक गणतन्त्र' धइगु लाइन मोहन बैद्य 'किरण'यागु खः लाकि डा. बाबुराम भट्टराईयागु खः धकाः छगू कथं बहस जुयाच्वंगु नापं संचार माध्यमं थीथी कथंया खँत पित हयाच्वंगुलिं छुं दिं न्ह्यः जक स्थायी समितिया मुँज्या च्वनाः उगु लाइन वय्कःपिं निम्हं नेतातय्गु मखु बरु अध्यक्ष प्रचण्डयागु खः अले नेता नं प्रचण्ड हे खः धकाः ठहर यायेधुंकाः कार्यकर्तातय्त छगू हे धारय् हयेगु निंतिं नं थुगु प्रशिक्षण ज्याझ्वः याःगु खँ धाःगु दु। कार्यकर्तायात प्रशिक्षित यायेगु ज्याझ्वः खःसां अन कार्यकर्तातय्सं नेतातय्त नं पार्टीयात एमालेकरण यात धकाः कडा आलोचना याःगु खँ धाःगु दु ।
थौं नं रिपोर्टिङ
ख्वपया खरिपाटीइ न्ह्यानाच्वंगु माओवादीया प्रशिक्षणया झ्वलय् थौं सुथय् ९ ता इलंनिसें हे राज्य समितिया इन्चार्ज, विभागिय नापं जबस मोर्चाया इन्चार्जतय्सं थःथःगु रिर्पोटिङ तयेगु ज्या जुयाच्वंगु दु। अथे रिर्पोटिङ तयेगु झ्वलय् अप्वःयाना पार्टीया नेतृत्वयात आलोचना यायेगु यानाच्वंगु दु धकाः उगु प्रशिक्षणय् ब्वति कयादीम्ह छम्ह नेतां 'सन्ध्या टाइम्स'यात कनादीगु दु ।
थ्व हे झ्वलय् पार्टीया केन्द्रीय कमिटी, पोलितब्यूरो नापं स्थायी समिति विस्तारया यायेगु खँ दक्ले लिपा जक पिहांवइ धकाः धाःगु दु। माओवादीया सल्लाहकार जुयाच्वनादीम्ह सभासद दिलिप महर्जनयात थुगुसी केन्द्रीय कमिटीइ यंकीगु प्रायः निश्चित जुइ धुंकूगु दु धकाः नं धाःगु दु ।
