निगू प्रदेश खारेज यायेमाःगु जनजातिया माग
येँ (सन्ध्या टाइम्स)/संविधानसभाया राज्य पुनर्संरचना नापं राज्य शक्ति बाँडफाँड समितिं तयार याःगु झिंप्यंगू प्रदेश मध्ये सुनकोशी प्रदेश व नारायणी प्रदेशया खारेज यायेमाःगु माग यानाः आदिवासी जनजाति वृहत् संयुक्त मोर्चां थौं छगू पत्रकार सम्मेलन याना आन्दोलन घोषणा याःगु दु ।
नेवाः स्वायत्त राज्य मंकाः संघर्ष समिति नापं आदिवासी जनजातिया थीथी खुगू मंकाः मोर्चा दुथ्याःगु उगु वृहत् संयुक्त मोर्चां फागुन १२ गते संविधानसभा व राजनीतिक दलयात ज्ञापनपत्र बीगु, फागुन २१ गते संविधानसभाया भवनयात घेराउ यायेगु नापं फागुन महिना दुने स्वायत् प्रदेश स्तरीय सभा यायेगु धकाः संघर्षया ज्याझ्वः घोषणा याःगु खः।
संविधानसभाया राज्य पुनर्संरचना नापं राज्य शक्ति बाँडफाँड समितिं तयार याःगु झिंप्यंगू प्रदेशया अवधारणाय् कमजोरी जूगु खँ भिंके माःगु, अवशिष्ट अधिकार प्रदेशयात दयेमाःगु, अग्राधिकारया सवालय् सीमा क्वःछीमाःगु, प्रदेशया सीमाङकन भिंकेमाःगु नापं थीथी कथंया माग यानाः आन्दोलन घोषणा याःगु खः। आदिवासी जनजाति आन्दोलनया झ्वलय् चैत्रनिसें अझ सशक्त आन्दोलन यायेगु खँ उगु वृहत् मोर्चाया छ्याञ्जे कुमार तामाङं
'सन्ध्या टाइम्स'यात कनादीगु दु ।
