ध्यबा मदयाः खाडीया खोरय्
थःगु देशय् छेँबुँ बरः तयाः जूसां नेपाःमित ध्यबा कमे यायेगु ताः तयाः खाडी देशय् ज्या याः वनी । तर अन थ्यंकाः धाःसा ध्यबा मदयाः उपिं खोरय् च्वनेत तकं बाध्य जुइमाली । थौंकन्हय् खाडीया सउदी अरब कतार आदि देशय् सलंसः नेपाःमित मात्र छेँय् लिहां वयेत टिकट न्यायेगु ध्यबा मदयाः खोरय् लानाच्वंगु खँ सीदुगु दु ।
विज्ञ सूत्रं बिउगु जानकारी कथं थौकन्हय् सउदी अरबया राजधानी रियादया जेलय् करिब द्वःछि नेपाःमि कुनातःगु दुसा उकी मध्यय् सछिम्ह टिकट न्यायेगु ध्यबा मदयाः जक पिहां मये मखनाच्वंगु खँ धाःगु दु । अथे हे कतारया राजधानी दोहाया जेलय् नं करिब झिम्ह ति नेपाःमित टिकट न्यायेगु ध्यबा मदयाः कुंकाच्वनेमाःगु दु । नेपाः लिहां वयेगु ध्यबा दयेसातकि उपिं नेपाः वयेफइगु खँ धाःगु दु ।
अथे हे गुलिखे नेपाःमित वासः यायेगु ध्यबा मदयाः अलपत्र जुयाच्वंगु खँ नं सीदुगु दु । वासः याकेत अस्पताल वंबलय् ध्यबा मदयाः उमित अस्पतालं ज्वनातःगु खः । थुकिं यानाः उपिं ज्याय् तकं वने मखनाच्वंगु दु ।
उगु देय्या नेपाली दूतावासं धाःसा थःपिंके मनू सीसा क्रियाकर्म यायेत जक बजेट दु अज्याःगु ज्याया बजेट मदु धकाः ग्वाहालि यानाच्वंगु मदु । थ्वहे इलय् अन ज्या याईपं ज्यामितय्सं थःपिंत आपत जुइबलय् छ्यलेगु धकाः नेपाल सरकारं खडा यानातःगु कल्याण कोष छ्यलेमाःगु बिचाः प्वंकाहःगु दु । थ्व कल्याण कोषय् ११ करोड दां मुनाच्वने धुंकूगु दु ।
