माओवादी प्रति कांग्रेस नेतातय् आक्रोश
नेपाली कांग्रेसया नेतातय्सं संविधान निर्माण यायेगु ज्याय् माओवादी बाधक जूगु व आः देशय् खनेदुगु समस्या माओवादीया कारणं जूगु धासें आक्रोश प्वंकूगु दु ।
भरतपुरय् बिहीवाः संचारकर्मीत नाप खँल्हाबंला यानादिसें कांग्रेस वरिष्ठ नेता शेरबहादुर देउवां माओवादीया कारणं देय् समस्याया भुमरीलय् लाःगु द्वपं बियादिल । वयेकलं न्हापा जूगु सहमतियात माओवादीं पूर्णरुपं पालना यायेमाःगु खँय् बः बियादिसें सहमतिया राजनीति मत्वःतेत माओवादी नेतातय्त इनाप यानादिल ।
अथेहे दमौलीलय् संचारकर्मीत लिसें खँल्हाबंला यानादिसें कांग्रेस उपसभापति रामचन्द्र पौडेलं संविधान निर्माणय् माओवादी बाधक जूगु द्वपं बियादिल । वयेकलं माओवादीं ल्वाभःया भरय् संविधान निर्माण यायेत स्वःगु धयादिसें माओवादीं निर्माण यायेत स्वःगु संविधान जनताया जुइमफइगु धयादिल ।
पौडेलं दलत दथुइ सहमति जुसाः खुइन्हु दुने शान्ति प्रकृयायात निष्कर्षय् थ्यंकेफइगु व गुइगुइन्हू दुने संविधान जारी यायेफइगु धयादिसें संविधान जारी याये न्ह्यः हे माओवादी लडाकुया पुन:स्थापना जुइमाःगु खँय् बः बियादिल ।
