दलत दथुइया स्वपू बांलानाच्वंगु दु : सभामुख
संविधानसभाया अध्यक्ष सुवासचन्द्र नेम्वाङं दलत दथुइ लिप्पांगु इलय् स्वापू बांलानावःगु खँ धयादीगु दु । वयेकलं राजनीतिक दलत दथुइ बांलानावःगु स्वापूतिं इलय् हे संविधान निर्माण यायेत ग्वाहालि जुइगु धयादिल । नापं वयेकलं जेठ १४य् संविधान जारी जुइमखुलाः धइगु शंकाः अप्वसां निरन्तर संविधान निर्माण जुयाच्वंगुलिं इलय् हे संविधान निर्माण जुइगु विश्वास प्वंकादिल ।
बिहीवाः बुटवलय् शहीद नारायण पोखरेल रामपुर क्याम्पसं पिथंगु धार्मिक शहीद नारायण पोखरेल स्मृति ग्रन्थया विमोचन यानादिसें वयेकलं निरन्तर संसद अवरुद्ध जुसां नं संविधान निर्माण यायेगु ज्या जुयाहेच्वंगु व आः नं संविधान निर्माण सम्बन्धी आवश्यक ज्या जुयाच्वंगु धयादिल ।
अथेहे वयेकलं इलय् हे संविधान निर्माण यायेत दलत दथुइ सहमति व सहकार्यया विकल्प मदुगु धयादिल । नेम्वाङं थः न्ह्यावलें दलत दथुइ सहमति व सकार्यया निंतिं आवश्यक ग्वाहालि यायेत व वातावरण निर्माण यायेत क्रियाशील जुयाच्वनाःगु धयादिल । वयेकलं दलत सहमति व सम्झदारीलय् वंसाः जनताय् दलत प्रति अझ अप्वः विश्वास अप्वइगु बिचाः प्वंकादिल ।
