'सार्कय् भुटानी शरणार्थीया बारे खँ जुइ'
वइगु अप्रिलय् भुटानय् जुइगु झिंखुक्वःगु सार्क शिखर सम्मेलनय् नेपालं भुटानी शरणार्थीया छेँय् लितः छ्वयेगु पक्षय् ब: बिइगु जूगु दु ।
लुथरन वर्ल्ड फेडेरसन नेपाःया आर्थिक व प्राविधिक ग्वाहालिइ इन्हुरेड इन्टरनेसनलपाखें थौं यलय् ग्वसाःग्वःगु शरणार्थी कानुन सम्बन्धी सहलहस न्वंवानादिसें उपप्रधान व परराष्ट्रमन्त्री सुजाता कोइरालां उगु खँया जानकारी बियादीगु खः । परराष्ट्रमन्त्री कोइरालां नेपाःसं दुहांवःपिं शरणार्थीतय्त व्यवस्थित व नियमित यायेत न्हूगु कानुन दयेकेत्यंगु जानकारी नं बियादीगु दु । शरणार्थीपिंत ससम्मान छेँय् लिछ्वयेत सरकार न्ह्याबलें प्रतिबद्ध दुगु जानकारी बियादिसें वय्कलं थुकियाबारे परराष्ट्र मन्त्रालयं भुटान सरकारलिसे छक्वःपतिकं खँल्हानाच्वनागु धायदिल ।
इन्हुरेड इन्टरनेसनलया नायः डा. गोपाल शिवाकोटीं थःगु संस्थां 'शरणार्थी हैसियत निर्धारण व संरक्षण ऐन २०६६' दयेकूगु व थुकियात सम्बन्धित सरकारी पक्षया न्ह्यःने न्ह्यब्वःगु धयादिल । ज्याझ्वलय् मानवअधिकारकःमि कपील श्रेष्ठं भुटानी शरणार्थी लिछ्वयेगु निंतिं नेपालं अन्तर्राष्ट्रिय समुदायया ग्वाहालि कायेमफुगु व भारत सरकारं थुकिइ ग्वाहालि यानामच्वंगु खँ न्ह्यथनादिल ।
अथेहे ज्याझ्वलय् भुटानी शरणार्थी सेतु नेपालं भुटानी शरणार्थीतय्त ससम्मान थःगु देय् लिछ्वयेगु निंतिं कुतः यायेत सकसितं इनाप या:गु ख: ।
