राष्ट्रपति यादव हरिद्वारय्
भारत भ्रमणय् दीम्ह राष्ट्रपति डा. रामवरण यादव थौं पवित्र तीर्थस्थल हरिद्वार झायादीगु दु । राष्ट्रपति यादव हरिद्वारय् कुम्भ मेलाय् ब्वति कायेगुया लिसलिसे पतन्जलीसं च्वंगु रामदेवया योग शिविरय् नं ब्वति कयादीगु खः । वय्कः थौं हे न्हू दिल्ली लिहां झायादीगु दु । भारतया महत्वपूर्ण नेतात व सरकारी अधिकारित नापलाये ज्या क्वचायेका दीधुंकूम्ह यादव विहीवा: नेपाः लिहाँ झायादीगु ज्याझ्वः क्वछिनातःगु दु ।
भारतं नेपाःयात नीन्यागू करोड डलर सहुलियतपूर्ण त्यासा: बिइगु प्रस्ताव याःगु दु । राष्ट्रपति यादवया भारत भ्रमणया झ्वलय् प्रस्तावित त्यासा: निर्यात-आयातसम्बन्धी एक्जिम बैंकपाखें बिइगु जूगु दु ।
नांजाःगु भारतीय न्हिपौ 'दि इकोनोमिक टाइम्स'या कथं सहुलियतपूर्ण त्यासा:या लिसलिसे नीद्धः टन जाकि व मेगू निद्धः टन छ्वः बिइत नं भारतं प्रस्ताव याःगु दु । छुं दिं न्ह्यः नं भारतं न्ययेद्धः टन छ्वः व झिद्धः टन केऊ नेपालय् निर्यात यायेगु घोषणा याःगु खः ।
